لاہور( پاک ترک نیوز) امیر جماعت اسلامی حافظ نعیم الرحمان نے کہا ہے کہ ملک بھر میں جماعت اسلامی کے دھرنوں کی تعداد 40 ہوچکی ہے اور ہر گزرتے دن کے ساتھ دھرنوں میں عوام کی شرکت بڑھ رہی ہے۔حافظ نعیم الرحمان نے کہا کہ گزشتہ روز تیمرگرہ اور بٹ خیلہ میں تاریخی جلسے ہوئے، جبکہ کراچی سمیت ملک کے دیگر علاقوں میں جاری دھرنوں میں بھی عوام کی بڑی تعداد شریک ہے۔امیر جماعت اسلامی کا کہنا تھا کہ جماعت اسلامی کے دھرنے عوام کے لیے ہیں اور اب یہ ایک قومی تحریک بن چکی ہے۔ دھرنوں میں خواتین بھی بڑی تعداد میں شرکت کر رہی ہیں۔
انہوں نے کہا کہ جماعت اسلامی اگر آگے بڑھتی ہے تو اس کا براہ راست فائدہ عام آدمی کو ہوگا۔ حکومت نے مجبور ہوکر گزشتہ روز عوام کے لیے امدادی پیکیج کا اعلان کیا، تاہم مہنگائی کے موجودہ دور میں فی لیٹر 100 روپے کا ریلیف ناکافی ہے۔حافظ نعیم الرحمان نے کہا کہ امدادی پیکیج سے زیادہ ضروری ہے کہ پیٹرولیم مصنوعات پر عائد لیوی ختم کی جائے۔ حکومت عوام کو ریلیف دینے کے بجائے لیوی کے ذریعے بوجھ بڑھا رہی ہے۔انہوں نے کہا کہ جماعت اسلامی کے دھرنے جاری ہیں اور 20 ستمبر کے اسلام آباد لانگ مارچ کی تیاریاں بھی جاری ہیں۔ اگر حکومت نے لانگ مارچ میں رکاوٹ ڈالنے کی کوشش کی تو اس کی ذمہ دار خود حکومت ہوگی۔حافظ نعیم الرحمان کا کہنا تھا کہ جماعت اسلامی 25 کروڑ عوام کی امید بن چکی ہے، ہم عوام کو تنہا نہیں چھوڑیں گے اور انہیں ریلیف دلوا کر دم لیں گے۔
یہ بھی پڑھیں: جماعت اسلامی کا 20 ستمبر کو اسلام آباد مارچ کا اعلان
انہوں نے اعلان کیا کہ 20 ستمبر کو اسلام آباد میں تاریخی عوامی طاقت کا مظاہرہ ہوگا، جماعت اسلامی اسلام آباد پہنچ کر بیٹھ جائے گی اور حکومت کو مجبور کرے گی کہ عوام کو حقیقی ریلیف فراہم کیا جائے۔
