اسلام آباد ( پاک ترک نیوز) وزیراعظم شہباز شریف کی زیر صدارت ملک میں بہبود آبادی کے حوالے سے اہم جائزہ اجلاس ہوا ،جس میں اظہار خیال کرتے ہوئے وزیراعظم نے کہا تیزی سے بڑھتی ہوئی آبادی ملک کے لئے سب سے بڑا چیلنج ہے۔
وزیراعظم نے کہا بڑھتی ہوئی آبادی پر قابو پانے کے لئے اقدامات اور بہبود آبادی کو قومی فریضہ سمجھا جانا چاہئے ،آبادی میں توازن ہی پائیدار قومی ترقی کی ضمانت ہے،آبادی کی منصوبہ بندی کو قومی ترقی، معاشی استحکام اور انسانی وسائل کی بہتری سے ہم آہنگ کرنے کی ضرورت ہے۔
وزیراعظم شہبازشریف نے کہا بہبود آبادی کے اقدامات کے حوالے سے صوبوں کے ساتھ روابط اور ہم آہنگی کو مزید بہتر بنایا جائے ،بڑھتی ہوئی آبادی پر قابو پانے کے مؤثر عوامی آگہی مہم کا کلیدی کردار ہے ۔
وزیراعظم نے نیشنل پاپولیشن کونسل کا اجلاس جلد از جلد بلانے کی ہدایت کی ہے ،اجلاس کو ملک کی بڑھتی ہوئی آبادی بہبود آبادی اور نیشنل پاپولیشن کونسل کے اجلاس کی تیاریوں کے حوالے سے بریفنگ دی گئی۔
یہ بھی پڑھیں:ایران معاہدے کے لیے ہم سے بھیک مانگ رہا ہے،مارکو روبیو
بریفنگ میں کہا گیا نیشنل پاپولیشن کونسل سیکریٹریٹ کے آپریٹنگ طریقہء کار کو تیار کر لیا گیا ہے۔نیشنل سٹیبلائزیشن پلان 2026-2035 تیار کیا جا رہا ہے۔ جس میں ابادی بڑھنے کی رفتار کو کم کرنے کے حوالے سے قومی فریم ورک پیش کیا جائے گا ۔وفاقی حکومت کے سماجی تحفظ کے کئی اقدامات کو بہبود آبادی سے مشروط کرنے کے حوالے سے کام کا آغاز کردیا گیا ہے۔
