پشاور ( پاک ترک نیوز) وزیراعظم شہباز شریف نے کہا ہے کہ ملک سے آخری دہشت گرد کے خاتمے تک چین سے نہیں بیٹھیں گے اور ہمارے جوانوں اور افسروں کی قربانیاں کسی صورت رائیگاں نہیں جائیں گی۔یہ بات انہوں نے پشاور میں وفاقی ایپکس کمیٹی کے اجلاس سے خطاب کرتے ہوئے کہی۔ اجلاس میں خیبرپختونخوا کی امن و امان اور سکیورٹی کی مجموعی صورتحال پر غور اور دہشت گردی کے خلاف اقدامات کا تفصیلی جائزہ لیا گیا۔
وزیراعظم نے خیبرپختونخوا انتظامیہ کو دہشت گردی کے خلاف تمام تر معاونت فراہم کرنے کی پیش کش کرتے ہوئے کہا کہ صوبے کی پولیس، سیف سٹیز پروجیکٹ اور کاؤنٹر ٹیررازم ڈیپارٹمنٹ (سی ٹی ڈی) کے لیے جو کچھ بھی درکار ہوگا، وفاقی حکومت فراہم کرے گی۔اجلاس کے دوران عسکری حکام نے دہشت گردوں کے خلاف جاری انٹیلی جنس آپریشنز پر بریفنگ دی، جبکہ وزیر داخلہ محسن نقوی نے سکیورٹی صورتحال اور وفاق کی جانب سے صوبے کو دی جانے والی سہولیات سے آگاہ کیا۔
یہ بھی پڑھیں: چاند پر سپر کمپیوٹر کی دھماکے دار انٹری
اجلاس میں وفاقی وزیر قانون اعظم نذیر تارڑ، عطا تارڑ، امیر مقام، رانا ثناء اللہ، گورنر خیبرپختونخوا فیصل کریم کنڈی، آئی جی پولیس اور کور کمانڈر پشاور سمیت دیگر اعلیٰ سیاسی و عسکری حکام نے شرکت کی۔ خیبرپختونخوا میں ایمرجنسی اور گورنر راج کی بحث کے بعد وزیراعظم کا یہ پہلا دورہ پشاور تھا۔
