واشنگٹن ( پاک ترک نیوز) واشنگٹن پوسٹ نے دعویٰ کیا ہے کہ ایران جنگ کے دوران امریکی فوجیوں کی ہلاکتوں کی تعداد پینٹاگون کے سرکاری ریکارڈ سے زیادہ ہے۔رپورٹ کے مطابق امریکی محکمہ دفاع کے اندرونی جانی نقصان کے اعداد و شمار سے واقف پانچ امریکی حکام نے بتایا کہ جنگ کے آغاز سے اب تک کم از کم 22 امریکی فوجی ہلاک ہوچکے ہیں، جبکہ پینٹاگون کے عوامی ریکارڈ میں اس وقت 18 فوجیوں کی ہلاکتیں درج ہیں۔ ایک اور امریکی اہلکار نے ہلاکتوں کی تعداد 23 بتائی۔
واشنگٹن پوسٹ کے مطابق اضافی ہلاکتوں کی مکمل تفصیلات، جن میں فوجیوں کے نام، ہلاکت کی تاریخ، مقام اور وجوہات شامل ہیں، تاحال واضح نہیں۔ پینٹاگون نے ہلاکتوں کے اعداد و شمار میں فرق سے متعلق اخبار کے سوالات کا جواب نہیں دیا۔ رپورٹ میں بتایا گیا ہے کہ ایران جنگ کے دوران 820 سے زائد امریکی فوجی زخمی ہوچکے ہیں۔ ان میں متعدد اہلکار ایرانی جوابی حملوں کے نتیجے میں دماغی چوٹوں کا شکار ہوئے۔ دوسری جانب ایران جنگ پر امریکی اخراجات کے حوالے سے بھی بڑی پیش رفت سامنے آئی ہے۔ امریکی سینٹرل کمانڈ کے مطابق 3 ستمبر تک جنگ کی لاگت تقریباً 43 ارب 60 کروڑ ڈالر تک پہنچ چکی تھی۔ اس رقم میں تقریباً 28 ارب ڈالر جنگ کے دوران استعمال ہونے والے اسلحے کی دوبارہ تیاری کے لیے درکار اخراجات شامل ہیں۔
یہ بھی پڑھیں: حکومت کا جماعت اسلامی سے ایک بار پھر رابطہ، مذاکرات کی پیشکش
امریکی سینٹرل کمانڈ کے تخمینے میں 4 ارب 30 کروڑ ڈالر سے زائد مالیت کے فوجی سازوسامان کے نقصان کے اخراجات بھی شامل ہیں، تاہم مشرق وسطیٰ میں امریکی فوجی اڈوں کو پہنچنے والے نقصانات کی مکمل لاگت اس مجموعے میں شامل نہیں۔ امریکی کانگریس کے غیر جانب دار بجٹ دفتر کے مطابق بھی جنگ کی لاگت اگست کے آغاز تک تقریباً 38 ارب ڈالر ہوچکی تھی اور لڑائی کی شدت کے مطابق اخراجات میں ہر ماہ مزید 2 سے 3 ارب ڈالر اضافہ ہوسکتا ہے۔
