تہران ( پاک ترک نیوز) ایران نے امریکا سے معاہدے کے لیے سات نکات تسلیم کرنے کی شرط رکھ دی۔ پاکستان اور قطر کی ثالثی میں دونوں ممالک کے درمیان سفارتی رابطوں میں تیزی آگئی ہے۔ ایرانی وزارت خارجہ کے ترجمان اسماعیل بقائی کا کہنا ہے کہ معاہدے کا انحصار امریکی سیاسی بصیرت پر ہے، ایران سفارت کاری اور فوجی تصادم دونوں صورتوں کے لیے تیار ہے۔اسماعیل بقائی نے واضح کیا کہ ایران کے سات نکات تسلیم کیے بغیر کوئی معاہدہ نہیں ہوگا۔ ان کا کہنا تھا کہ حتمی معاہدہ طے پانے کی صورت میں ایران دو روز کے اندر آبنائے ہرمز کھول دے گا۔
یہ بھی پڑھیں: ایران پر امریکی حملے کے بعد خام تیل مہنگا
ایرانی ترجمان کے مطابق تہران اپنا افزودہ یورینیم کسی دوسرے ملک منتقل کرنے پر رضامند نہیں، ایران اپنے جوہری ذخائر پر کوئی سمجھوتہ نہیں کرے گا۔ ان کا مزید کہنا تھا کہ ایران کا جوہری پروگرام ماضی میں بھی پُرامن تھا اور آج بھی پُرامن ہے۔
