کراچی ( پاک ترک نیوز) میر رضا قتل کیس کی تفتیش میں اہم پیش رفت سامنے آئی ہے، تفتیشی حکام نے مزید تحقیقات کے لیے 10 افراد کی فہرست تیار کرلی ہے۔
ذرائع کے مطابق فہرست میں شامل تمام افراد سے میر رضا نے مبینہ طور پر قرض لے رکھا تھا۔ تفتیشی حکام نے ان 10 افراد سے مجموعی طور پر 5 کروڑ روپے سے زائد قرض لیے جانے کی تفصیلات بھی مرتب کرلی ہیں۔
ذرائع کا کہنا ہے کہ پولیس نے ان افراد کو شاملِ تفتیش کرنے اور پوچھ گچھ کے لیے طلب کرنے کا فیصلہ کیا ہے۔ تفتیشی ٹیم مختلف پہلوؤں سے تحقیقات کررہی ہے اور یہ جاننے کی کوشش کی جارہی ہے کہ میر رضا کے مالی معاملات اور قرضوں کا قتل کے واقعے سے کوئی تعلق تھا یا نہیں۔
دوسری جانب میر رضا کے حوالے سے نیشنل سائبر کرائم انویسٹی گیشن ایجنسی سے بھی اہم معلومات سامنے آئی ہیں۔ذرائع کے مطابق میر رضا کا نیشنل سائبر کرائم انویسٹی گیشن ایجنسی میں کوئی ریکارڈ موجود نہیں۔
یہ بھی پڑھیں, فرانس کا غزہ اور ایران پر مؤقف منافقانہ ہے، لیکچر دینے سے باز رہے: عراقچی
این سی سی آئی اے نے ایس ایس پی انویسٹی گیشن کورنگی کی جانب سے بھیجے گئے خط کا جواب دے دیا ہے، جس میں میر رضا سے متعلق ادارے کے ریکارڈ کے بارے میں آگاہ کیا گیا ہے۔
پولیس ذرائع کے مطابق قتل کیس کی تفتیش مختلف پہلوؤں سے جاری ہے، جبکہ مالی معاملات، قرضوں اور میر رضا سے رابطے میں رہنے والے افراد کے بارے میں بھی معلومات اکٹھی کی جارہی ہیں۔ حکام کا کہنا ہے کہ تفتیش کے دوران سامنے آنے والے شواہد کی روشنی میں مزید افراد سے بھی پوچھ گچھ کی جاسکتی ہے۔
