اسلام آباد(پاک ترک نیوز ) وزیراعظم شہباز شریف سے اسلامی تعاون تنظیم (او آئی سی) کے سیکریٹری جنرل اسماعیل اولد الشیخ احمد نے اسلام آباد میں ملاقات کی، جبکہ ای سی او وزرائے کونسل کے 30ویں اجلاس میں شرکت کے لیے آئے رکن ممالک کے وزرائے خارجہ اور وفود کے سربراہان نے بھی وزیراعظم سے ملاقات کی۔
او آئی سی کے سیکریٹری جنرل سے ملاقات میں وزیراعظم نے عہدہ سنبھالنے کے بعد ان کے پہلے دورہ اسلام آباد پر خیرمقدم کیا اور کہا کہ رکن ممالک کی جانب سے اتفاق رائے سے ان کا انتخاب ان کی قیادت پر اعتماد کا مظہر ہے۔
سیکریٹری جنرل او آئی سی نے خطے میں امن و استحکام کے لیے پاکستان کی مسلسل کوششوں کو سراہا۔ دونوں رہنماؤں نے اتفاق کیا کہ مسلم امہ کو درپیش اہم مسائل کے حل کے لیے او آئی سی کو مشترکہ کوششوں کی قیادت کرنا ہوگی۔ اس موقع پر فلسطین اور جموں و کشمیر کے عوام کی حمایت جاری رکھنے کے عزم کا بھی اعادہ کیا گیا۔
وزیراعظم شہباز شریف نے کہا کہ پاکستان کو مسلم امہ کے مشترکہ چیلنجز سے نمٹنے کے لیے قائدانہ کردار ادا کرنے پر فخر ہے اور پاکستان او آئی سی کی کوششوں کی حمایت کے لیے ہمیشہ تیار ہے۔
دوسری جانب ای سی او وزرائے کونسل کے 30ویں اجلاس میں شرکت کے لیے آنے والے رکن ممالک کے وزرائے خارجہ اور وفود کے سربراہان سے ملاقات میں وزیراعظم نے ان کا خیرمقدم کیا اور اجلاس میں شرکت پر شکریہ ادا کیا۔
وزیراعظم نے کہا کہ پاکستان ای سی او کے مقاصد کے حصول اور رکن ممالک کے درمیان علاقائی تعاون کے فروغ کے لیے پرعزم ہے۔ روابط کا فروغ اور معاشی انضمام حکومت کی اہم ترجیحات میں شامل ہیں۔
انہوں نے ای سی او وزرائے کونسل کے اجلاس کے کامیاب انعقاد پر اطمینان کا اظہار کرتے ہوئے کہا کہ اسلام آباد اعلامیے اور 2026ء سے 2035ء تک معاشی تعاون کے تزویراتی اہداف کی منظوری اہم پیش رفت ہے۔
شہباز شریف نے کہا کہ پاکستان کو 2026ء سے 2027ء تک ای سی او کی صدارت ملنا ایک اہم ذمہ داری ہے۔ رواں سال کا موضوع مضبوط اور مستحکم ای سی او کے لیے علاقائی تعاون کی بحالی ہوگا۔
وزیراعظم نے تجارت، سرمایہ کاری، ٹرانسپورٹ، توانائی اور اطلاعاتی ٹیکنالوجی کے شعبوں میں تعاون بڑھانے پر زور دیتے ہوئے کہا کہ ای سی او کے مشترکہ وژن کو عملی اقدامات میں تبدیل کرنا ضروری ہے تاکہ خطے کے عوام کو حقیقی فوائد حاصل ہو سکیں۔
انہوں نے کہا کہ پاکستان سڑکوں، ریلوے اور ٹرانسپورٹ راہداریوں کے ذریعے علاقائی روابط مضبوط بنانے کے لیے پرعزم ہے۔ کراچی، پورٹ قاسم اور گوادر کی بندرگاہیں سمندر تک براہ راست رسائی نہ رکھنے والے رکن ممالک کو عالمی منڈیوں تک رسائی فراہم کرنے میں اہم کردار ادا کر سکتی ہیں۔
وزیراعظم نے علاقائی سلامتی کو درپیش خطرات سے نمٹنے کے لیے مشترکہ کوششوں کو ناگزیر قرار دیتے ہوئے کہا کہ تنازعات کے پُرامن حل کے لیے مذاکرات اور سفارت کاری پاکستان کا اصولی مؤقف ہے۔
انہوں نے ای سی او رکن ممالک کو لاہور کو 2027ء کا سیاحتی مرکز قرار دیے جانے کی تقریبات میں شرکت کی دعوت بھی دی۔ وزیراعظم کے مطابق پاکستان 2027ء میں ای سی او وزرائے کونسل کے آئندہ اجلاس اور سربراہی اجلاس کی میزبانی کرے گا اور تنظیم کو مضبوط بنانے کے لیے تمام رکن ممالک اور سیکریٹریٹ کے ساتھ مل کر کام کرے گا۔












