راولپنڈی(پاک ترک نیوز ) حنا جاوید قتل کیس میں تقریباً تین ماہ گزرنے کے باوجود پولیس کی جانب سے چالان جمع نہ کرائے جانے پر ڈسٹرکٹ پراسیکیوشن برانچ نے نوٹس لیتے ہوئے سی پی او راولپنڈی سے جواب طلب کرلیا۔ڈسٹرکٹ پراسیکیوٹر نے سی پی او راولپنڈی کو خط لکھ کر مؤقف اختیار کیا ہے کہ قانون کے مطابق پولیس 14 روز کے اندر چالان عدالت میں پیش کرنے کی پابند ہے، تاہم 86 روز گزرنے کے باوجود اس اہم قتل کیس کا چالان تاحال جانچ پڑتال کے لیے بھی جمع نہیں کرایا گیا۔
خط میں کہا گیا ہے کہ ضابطہ فوجداری کی دفعہ 173 کے تحت تفتیشی رپورٹ جمع کرانے کی مقررہ مدت پوری ہوچکی ہے۔ متعلقہ ایس ایچ او اور تفتیشی افسر کو ہدایت کی گئی ہے کہ قانونی کارروائی مکمل کرکے چالان جانچ پڑتال کے لیے پراسیکیوشن برانچ میں پیش کیا جائے۔حنا جاوید کو رواں سال 20 اگست کو ان کے گھر میں تشدد کرکے قتل کیا گیا تھا، جس کا مقدمہ تھانہ سول لائنز میں درج ہے۔مقدمے میں مقتولہ کے شوہر فیصل اصغر اور گھریلو ملازم ذیشان ارشد جوڈیشل ریمانڈ پر اڈیالہ جیل میں قید ہیں۔
یہ بھی پڑھیں: پاک بھارت فٹبال فائنل کا جوش لیاری پہنچ گیا، انٹرنیشنل اسٹیڈیم میں بڑی اسکرین لگانے کا فیصلہ
دوسری جانب مقتولہ کے اہل خانہ نے پولیس کی تفتیش پر تحفظات کا اظہار کرتے ہوئے واقعے کی شفاف تحقیقات کے لیے جوڈیشل کمیشن بنانے کا مطالبہ بھی کیا ہے۔












