واشنگٹن ( پاک ترک نیوز) امریکہ کے صدر ڈونلڈ ٹرمپ نے دعویٰ کیا ہے کہ اگر ایران ان کے خلاف کسی قاتلانہ کارروائی میں کامیاب ہوتا ہے تو اس صورتِ حال سے نمٹنے کے لیے وہ پہلے ہی متعلقہ ہدایات دے چکے ہیں۔
امریکی نشریاتی ادارے CNN کے مطابق، صدر ٹرمپ نے نیویارک پوسٹ کو انٹرویو دیتے ہوئے کہا کہ وہ کافی عرصے سے ایران کے ممکنہ اہداف کی فہرست میں شامل ہیں۔ ان کا کہنا تھا کہ اگر ان کے ساتھ کوئی ایسا واقعہ پیش آتا ہے تو امریکہ کو بھرپور اور سخت جواب دینا چاہیے۔
ٹرمپ نے کہا، "میں نے پہلے ہی ہدایات دے رکھی ہیں کہ اگر میرے ساتھ کچھ ہوتا ہے تو ایسا جواب دیا جائے جو پہلے کبھی نہ دیکھا گیا ہو۔”
یہ بھی پڑھیں: امریکا ،ایران کے آج عمان میں مذاکرات ،ٹرمپ کی اپنی ٹیم کو بات چیت جاری رکھنے کی ہدایت
اسرائیل کی جانب سے ایران کی مبینہ سازش سے متعلق خفیہ معلومات فراہم کیے جانے کے سوال پر ٹرمپ نے کہا کہ اسرائیل نے انہیں اس حوالے سے کوئی نئی اطلاع نہیں دی، تاہم ان کے بقول ایران کئی برسوں سے انہیں نشانہ بنانا چاہتا ہے۔
یاد رہے کہ فروری 2025 میں بھی صدر ٹرمپ نے اسی نوعیت کا بیان دیتے ہوئے کہا تھا کہ اگر ایران ان پر حملہ کرتا ہے تو اس کے جواب میں سخت کارروائی کی جائے گی۔
