منیلا ( پاک ترک نیوز) فلپائن کے شمالی علاقے اپایاؤ کے جنگلات میں دنیا کے سب سے بڑے چمگادڑوں میں شمار ہونے والے گولڈن کراؤنڈ فلائنگ فاکس کو پہلی بار ریکارڈ کیا گیا ۔ تقریباً پانچ فٹ پروں کے پھیلاؤ والے اس نایاب چمگادڑ کی موجودگی کو خطے کی حیاتیاتی تنوع سے متعلق اہم دریافت قرار دیا جا رہا ہے۔غیر ملکی ویب سائٹ اے زیڈ اینیملز کی رپورٹ کے مطابق، اس چمگادڑ کو اپایاؤ کے علاقے فلورا میں خطرے سے دوچار جنگلی حیات کی نگرانی کے لیے کیے گئے سروے کے دوران دستاویزی شکل دی گئی۔ یہ سروے فلپائن کے محکمہ ماحولیات و قدرتی وسائل اور اپایاؤ کی مقامی حکومت نے مشترکہ طور پر کیا۔
رپورٹ کے مطابق اس نوع کا سائنسی نام Acerodon jubatus ہے۔ یہ فلپائن میں پائی جاتی ہے اور دنیا کے بڑے ترین چمگادڑوں میں شمار ہوتی ہے۔ اپایاؤ یونیسکو کے نامزد کردہ بایوسفیئر ریزرو کا حصہ ہے، اس لیے یہاں موجود نایاب جنگلی حیات کی شناخت اور نگرانی کو خاص اہمیت حاصل ہے۔ گولڈن کراؤنڈ فلائنگ فاکس کے پروں کا پھیلاؤ تقریباً 4.9 سے 5.6 فٹ تک ہوسکتا ہے، جبکہ اس کے جسم کی لمبائی تقریباً 10 سے 13 انچ ہوتی ہے۔ اس کا وزن تقریباً 3.1 پاؤنڈ تک بتایا جاتا ہے۔
اس چمگادڑ کے سر اور گردن پر سنہری یا زرد مائل بال ہوتے ہیں، جس کی وجہ سے اسے گولڈن کراؤنڈ کا نام دیا گیا ہے۔ اس کی کمر سرخی مائل بھوری، جبکہ چہرہ، گلا اور جسم کا نچلا حصہ عموماً سیاہ ہوتا ہے۔اپنے غیر معمولی حجم کے باوجود یہ چمگادڑ بنیادی طور پر پھل اور پودوں کی خوراک استعمال کرتا ہے۔ انجیر اس کی پسندیدہ غذاؤں میں شامل ہے۔ یہ رات کے وقت خوراک کی تلاش میں نکلتا ہے، جبکہ دن کے وقت درختوں پر آرام کرتا ہے۔ بعض اوقات یہ دوسرے بڑے چمگادڑوں کے قریب بھی بسیرا کرتا ہے۔
رپورٹ کے مطابق گولڈن کراؤنڈ فلائنگ فاکس کو عالمی ادارہ برائے تحفظِ قدرت (آئی یو سی این) نے خطرے سے دوچار انواع میں شامل کر رکھا ہے، جبکہ اس کی آبادی میں کمی کا خدشہ ظاہر کیا جاتا ہے۔
