ریاض ( پاک ترک نیوز) یمنی فورسز نے سعودی قیادت میں کارروائیوں کے دوران گزشتہ 24 گھنٹوں میں انصار اللہ کے 30 جنگجوؤں کو ہلاک اور 60 کو زخمی کرنے کا دعویٰ کیا ہے۔ترک خبر ایجنسی کے مطابق یمنی فورسز نے مغربی یمن کے ضلع الوازعیہ میں فضائی کارروائیاں کیں، جن کے دوران حوثیوں کی متعدد گاڑیوں کو بھی نشانہ بنایا گیا۔رپورٹ کے مطابق سعودی طیاروں نے مغربی یمن میں حوثیوں کے متعدد ٹھکانوں پر بھی حملے کیے اور 24 گھنٹوں کے دوران 54 فضائی حملے کیے۔
میڈیا رپورٹس میں دعویٰ کیا گیا ہے کہ یمنی فضائی حدود میں سعودی عرب کو فضائی برتری حاصل ہے، جبکہ حوثیوں کے پاس مؤثر فضائیہ اور مضبوط فضائی دفاعی نظام موجود نہیں۔رپورٹس کے مطابق سعودی عرب اپنی فضائی حدود اور مقدس مقامات کے تحفظ کے لیے جدید دفاعی نظام استعمال کر رہا ہے۔مکہ مکرمہ کی جانب بڑھنے والے حوثیوں کے ایک ڈرون کو بھی سعودی فضائی دفاعی نظام نے فضا میں تباہ کرنے کا دعویٰ کیا تھا۔سعودی عرب نے مکہ مکرمہ، مدینہ منورہ اور دیگر مقدس مقامات کے تحفظ کے لیے دفاعی نظام کی متعدد پرتیں قائم کر رکھی ہیں، جن میں پیٹریاٹ فضائی دفاعی نظام، جدید ریڈار، میزائل لانچر اور پینتیس ملی میٹر طیارہ شکن توپیں شامل ہیں۔
