اسلام آباد (پاک ترک نیوز ) پاکستان نے چشمہ نیوکلیئر پاور پلانٹ سی-5 کے ڈوم کی کامیاب تنصیب کے ساتھ جوہری توانائی کے شعبے میں اہم سنگ میل عبور کر لیا۔
وزیراعظم محمد شہباز شریف چشمہ نیوکلیئر پاور پلانٹ سی-5 کے ڈوم کی تنصیب کی تقریب میں بطور مہمان خصوصی شریک ہوئے۔ فیلڈ مارشل سید عاصم منیر، چیف آف آرمی اسٹاف و چیف آف ڈیفنس فورسز بھی تقریب میں موجود تھے۔
تقریب میں چینی حکام، اعلیٰ سرکاری عہدیداران اور متعلقہ اداروں کے نمائندوں نے بھی شرکت کی۔
اس موقع پر وزیراعظم شہباز شریف نے منصوبے پر کام کرنے والے پاکستانی اور چینی انجینئرز، تکنیکی ماہرین اور کارکنوں کی خدمات کو سراہتے ہوئے انہیں خراج تحسین پیش کیا۔
وزیراعظم کا کہنا تھا کہ چشمہ نیوکلیئر پاور پلانٹ سی-5 کی تعمیر کا اہم مرحلہ مقررہ وقت سے پہلے مکمل کیا گیا ہے۔ یہ منصوبہ پاکستان میں صاف، سستی اور ماحول دوست بجلی کی پیداوار کی جانب اہم پیش رفت ہے۔
شہباز شریف نے پاکستان اور چین کی ہمہ موسمی دوستی اور اسٹریٹجک تعاون کے عزم کا اعادہ کرتے ہوئے کہا کہ دونوں ممالک اقتصادی، دفاعی اور ترقیاتی شعبوں میں تعاون کو مزید وسعت دینے کے لیے پرعزم ہیں۔
انہوں نے منصوبے کی تکمیل میں کردار ادا کرنے والے دونوں ممالک کے ماہرین اور کارکنوں کی محنت کو سراہا۔
