نیویارک(پاک ترک نیوز)گوگل نے اپنے مصنوعی ذہانت کے پلیٹ فارم جیمنائی میں ’میموری سمری‘ کے نام سے نیا فیچر متعارف کرانا شروع کر دیا ہے، جس کے ذریعے صارفین دیکھ سکیں گے کہ جیمنائی ان کے بارے میں کون سی معلومات یاد رکھتا ہے۔
اس فیچر کے تحت صارفین اپنی محفوظ شدہ معلومات دیکھنے، ان میں ترمیم کرنے یا انہیں ڈیلیٹ کرنے کے ساتھ نئی تفصیلات بھی شامل کر سکیں گے۔ گوگل کے مطابق میموری سمری میں صارفین کی بنیادی معلومات، پیشہ ورانہ سرگرمیوں، سفری ترجیحات، میڈیا و تفریح اور طرزِ زندگی سے متعلق تفصیلات مختلف زمروں میں دکھائی جائیں گی۔
صارفین نیچے موجود ٹیکسٹ باکس میں ہدایات دے کر معلومات شامل یا حذف کر سکتے ہیں۔ مثال کے طور پر صارف جیمنائی کو بتا سکتا ہے کہ وہ جاپانی زبان بولتا ہے یا اپنی پرانی فون نمبر کی معلومات حذف کرنے کی درخواست کر سکتا ہے۔
یہ بھی پڑھیں: بلوچستان ہائی کورٹ نے عبدالمجید اچکزئی کی بریت کا فیصلہ کالعدم قرار دے دیا، 10 سال قید کی سزا
فیچر میں پنسل آئیکون کے ذریعے وسیع تر تبدیلیوں کی سہولت بھی دی گئی ہے، جبکہ تھری ڈاٹس مینو میں موجود ’میموری ہسٹری‘ سے یہ دیکھا جا سکے گا کہ کوئی معلومات کب شامل یا تبدیل کی گئی تھیں۔
فی الحال یہ سہولت امریکا میں انگریزی زبان استعمال کرنے والے گوگل اے آئی سبسکرائبرز کے لیے متعارف کرائی جا رہی ہے، بشرطیکہ ان کے اکاؤنٹ میں ’کیپ ایکٹیویٹی‘ اور میموری فعال ہوں۔ ویب صارفین اسے جیمنائی کی سیٹنگز میں ’پرسنل انٹیلی جنس‘ کے ذریعے یا براہِ راست متعلقہ لنک سے استعمال کر سکتے ہیں۔ موبائل ایپلی کیشنز میں اس کی دستیابی تاحال سامنے نہیں آئی۔
