اسلام آباد (پاک ترک نیوز )وزیراعظم شہباز شریف نے ملک میں کیش لیس معیشت کے فروغ کے لیے سو فیصد ڈیجیٹل ادائیگیوں کا نظام قائم کرنے کی ہدایت کردی۔ تمام وزارتوں اور سرکاری اداروں کو مقررہ مدت میں ڈیجیٹل ادائیگیوں کا منصوبہ مکمل کرنے کا حکم بھی دے دیا گیا۔
وزیراعظم محمد شہباز شریف کی زیر صدارت کیش لیس معیشت کے فروغ سے متعلق اعلیٰ سطح کا اجلاس ہوا، جس میں ملک بھر میں ڈیجیٹل ادائیگیوں کے نظام پر جاری پیش رفت کا جائزہ لیا گیا۔
اجلاس سے خطاب کرتے ہوئے وزیراعظم نے کہا کہ کیش لیس معیشت کا فروغ حکومت کی اہم ترین ترجیحات میں شامل ہے اور اس کے مثبت نتائج سامنے آنا شروع ہوگئے ہیں۔ وزارت خزانہ اور متعلقہ ریاستی اداروں کی کاوشیں قابل ستائش ہیں۔
وزیراعظم نے حکام کو ہدایت کی کہ ملک میں سو فیصد ڈیجیٹل ادائیگیوں کے نظام کے قیام کے لیے واضح لائحہ عمل اور مقررہ مدت کے ساتھ اہداف پیش کیے جائیں۔ ڈیجیٹل ادائیگیوں کے دوران صارفین کو درپیش مسائل فوری حل کیے جائیں اور ملک بھر میں انٹرنیٹ کی فراہمی یقینی بنائی جائے۔
شہباز شریف نے راست کیو آر کوڈ کے ذریعے صارفین اور دکانداروں کے درمیان ڈیجیٹل ادائیگیوں کو فروغ دینے کی اسکیم حکومتی سرپرستی میں جاری رکھنے کی ہدایت بھی کی۔ ان کا کہنا تھا کہ راست کیو آر کوڈ کا نظام کیش لیس معیشت کے حکومتی وژن کے حصول میں معاون ثابت ہو رہا ہے۔
وزیراعظم نے بجلی اور گیس کے صارفین کو یوٹیلیٹی بلوں پر موجود کیو آر کوڈ کے ذریعے ادائیگیاں کرنے کی ترغیب دینے کے لیے مؤثر میڈیا مہم چلانے کی بھی ہدایت کی۔
اجلاس کو بریفنگ میں بتایا گیا کہ وفاقی اور صوبائی سرکاری اداروں میں ادائیگیوں کو ڈیجیٹل بنانے کا کام تیزی سے جاری ہے اور بیشتر اداروں میں دسمبر 2026 تک تمام ادائیگیاں مکمل طور پر ڈیجیٹل ہوجائیں گی۔
بریفنگ کے مطابق بینظیر انکم سپورٹ پروگرام کی سو فیصد ادائیگیاں ڈیجیٹل والٹس کے ذریعے کی جا رہی ہیں، جبکہ انٹرنیٹ کی عدم موجودگی میں بھی ڈیجیٹل ادائیگیوں کے لیے جدید نظام متعارف کرانے پر کام جاری ہے۔
اجلاس کو بتایا گیا کہ 15 نومبر 2026 سے آسان اسائنمنٹ اکاؤنٹس کے ذریعے چیک کی ادائیگیاں ختم کردی جائیں گی، جبکہ 16 نومبر سے ان اکاؤنٹس کی تمام ادائیگیاں راست ڈیجیٹل نظام کے ذریعے ہوں گی۔ اس سلسلے میں متعلقہ ڈرائنگ اینڈ ڈسبرسنگ افسران (DDOs) کو تربیت بھی دی جا چکی ہے۔
اجلاس میں وفاقی وزراء محمد اورنگزیب، شزا فاطمہ خواجہ، عطاء اللہ تارڑ، جنید انور چوہدری، علی پرویز ملک، سردار اویس لغاری، وزیراعظم کے مشیر رانا ثناء اللہ، وزیر مملکت برائے خزانہ بلال اظہر کیانی، گورنر اسٹیٹ بینک جمیل احمد، تمام صوبائی چیف سیکریٹریز اور متعلقہ اداروں کے اعلیٰ حکام نے شرکت کی۔
