بیجنگ( پاک ترک نیوز) چین کی بحری طاقت میں ایک اور اہم پیش رفت سامنے آگئی، دنیا کے جدید ترین طیارہ بردار بحری جہازوں میں شامل چینی سپر کیریئر فوجیان کی نئی ویڈیو منظرعام پر آگئی، جس میں اس کا پورا فلائٹ ڈیک جدید جے 15 جنگی طیاروں سے بھرا دکھائی دے رہا ہے۔
فوجیان چین کا پہلا سپر کیریئر ہے، جس کا وزن تقریباً 85 ہزار ٹن ہے۔ یہ امریکی بحریہ کے طیارہ بردار جہازوں کے بعد دنیا کا سب سے بڑا طیارہ بردار بحری جہاز قرار دیا جاتا ہے۔ نئی ویڈیو کو چینی بحریہ کی کیریئر ایوی ایشن صلاحیتوں میں پیش رفت کے طور پر دیکھا جا رہا ہے۔
فوجیان کی سب سے بڑی خصوصیت اس کا جدید الیکٹرومیگنیٹک کیٹاپلٹ سسٹم ہے، جس کے ذریعے جنگی طیاروں کو رن وے سے تیزی کے ساتھ فضا میں روانہ کیا جا سکتا ہے۔ جہاز پر تین کیٹاپلٹ سسٹمز نصب ہیں، جو بیک وقت متعدد طیاروں کی پرواز میں مدد دیتے ہیں۔
اس کے فلائٹ ڈیک پر نظر آنے والے جے 15 فلائنگ شارک جنگی طیارے طویل فاصلے تک کارروائی کرنے اور بھاری ہتھیار لے جانے کی صلاحیت رکھتے ہیں۔
جے 15 کے جدید ورژن جے 15 بی میں بہتر ایویونکس، جدید ریڈار، زیادہ پرواز کی صلاحیت اور جدید ہتھیار نصب کیے گئے ہیں، جس سے یہ چینی بحریہ کا اہم جنگی اثاثہ بن گیا ہے۔
چین نے رواں سال جولائی میں جے 15 کے اینٹی شپ ورژن کی بھی نمائش کی تھی، جس میں طیارے کو چار وائی جے 83 کے اینٹی شپ کروز میزائلوں سے لیس دیکھا گیا۔ ہر میزائل کا وزن تقریباً 700 کلوگرام اور ہدف کو نشانہ بنانے کی رینج تقریباً 230 کلومیٹر بتائی گئی ہے۔
اس کے علاوہ فروری میں سامنے آنے والی غیر سرکاری تصاویر میں جے 15 کو دو وائی جے 15 ہائپرسونک میزائلوں کے ساتھ بھی دیکھا گیا تھا، تاہم یہ تصاویر پرواز کی آزمائش سے متعلق تھیں۔
یہ بھی پڑھیں: امریکی جدید ترین جنگی طیارے ایف 35 کے 10 لاکھ سے زائد پرزے غائب
فوجیان پر جے 15 اور جدید پانچویں نسل کے جے 35 جنگی طیاروں کی ٹیک آف اور لینڈنگ کی کارروائیوں کی ویڈیوز ستمبر 2025 میں بھی جاری کی گئی تھیں۔ کیٹاپلٹ سسٹم کی بدولت یہ جہاز مختلف اقسام کے جنگی اور معاون طیارے آپریٹ کرنے کی صلاحیت رکھتا ہے۔
چین مستقبل میں مزید دو سپر کیریئرز بھی تیار کر رہا ہے، جن میں سے ایک جوہری توانائی سے چلنے والا طیارہ بردار بحری جہاز ہوگا۔
ماہرین کے مطابق فوجیان چین کو اپنے ساحلی علاقوں سے دور سمندروں میں بھی فضائی کارروائیاں جاری رکھنے کی صلاحیت فراہم کر سکتا ہے۔ یوں چین کا طیارہ بردار بحری بیڑا جدید جنگی ٹیکنالوجی کے ساتھ تیزی سے وسعت اختیار کر رہا ہے، جس کے اثرات مستقبل میں بحرالکاہل اور عالمی سمندری طاقت کے توازن پر بھی مرتب ہو سکتے ہیں۔
