اسلام آباد ( پاک ترک نیوز) ترجمان دفتر خارجہ کے مطابق وزیراعظم شہباز شریف آج سے 12 نومبر تک ترکیہ کا دورہ کریں گے، جہاں وہ انطالیہ میں اقوام متحدہ کے موسمیاتی تبدیلی کنونشن کی کانفرنس کوپ 31 کے سربراہی اجلاس میں شرکت کریں گے۔وزیراعظم کل سربراہی اجلاس سے خطاب کریں گے اور عالمی برادری پر زور دیں گے کہ موسمیاتی تبدیلی کے سنگین خطرات سے نمٹنے کے لیے عملی اور ٹھوس اقدامات کیے جائیں۔
ترجمان دفتر خارجہ کے مطابق وزیراعظم پاکستان میں شمسی توانائی کے فروغ، قابل تجدید توانائی کی استعداد میں اضافے اور موسمیاتی تبدیلیوں کا مقابلہ کرنے والی معیشت کی جانب پیش رفت کو اجاگر کریں گے۔وہ قدرتی آفات سے نمٹنے کی تیاری اور قبل از وقت وارننگ سسٹم کو مضبوط بنانے کے لیے پاکستان کی کوششوں پر بھی روشنی ڈالیں گے۔وزیراعظم ترقی پذیر ممالک کے لیے مناسب، قابل پیش گوئی اور آسانی سے دستیاب موسمیاتی مالی معاونت کی فراہمی پر بھی زور دیں گے۔دورے کے دوران وزیراعظم کوپ 31 کے تحت اعلیٰ سطح کے گول میز اجلاس میں شرکت کے علاوہ ترک قیادت اور دیگر عالمی رہنماؤں سے دوطرفہ ملاقاتیں بھی کریں گے۔
یہ بھی پڑھیں: امریکی جدید ترین جنگی طیارے ایف 35 کے 10 لاکھ سے زائد پرزے غائب
ترجمان دفتر خارجہ کا کہنا ہے کہ کوپ 31 میں وزیراعظم کی شرکت پاکستان کے عالمی موسمیاتی ایجنڈے کی حمایت اور موسمیاتی بحران سے نمٹنے کے لیے عالمی برادری کے ساتھ مل کر کام کرنے کے عزم کا اظہار ہے۔
