گرمیوں میں گاڑی کا شیشہ کیوں ٹوٹا ؟ اہم وجہ سامنے آ گئی

لاہور( پاک ترک نیوز) گاڑٰیوں کے مالکان ہو جائیں ہوشیار ،شدید گرمی میں ، گاڑی میں پرفیوم یا ایئر فریشنر رکھا تو گاڑی کا شیشہ ٹوٹ سکتا ہے،ماہرین کے مطابق گاڑی کے ڈیش بورڈ یا سامنے والے حصے میں پرفیوم، ایئر فریشنر یا دیگر دباؤ والی بوتلیں رکھنے سے نہ صرف آگ لگنے کا خطرہ بڑھ جاتا ہے بلکہ شدید گرمی میں شیشہ ٹوٹنے کا سبب بھی بن سکتا ہے۔ مزید تفصیلات اس رپورٹ میں۔
گرمیوں کے موسم میں بند گاڑی کا درجہ حرارت چند منٹوں میں خطرناک حد تک بڑھ سکتا ہے۔ ماہرین کا کہنا ہے کہ پرفیوم، ایئر فریشنر اور دیگر ایروسول مصنوعات میں گیس اور کیمیکل دباؤ کے ساتھ موجود ہوتے ہیں۔
جب یہ بوتلیں براہ راست دھوپ یا شدید گرمی کا سامنا کرتی ہیں تو ان کے اندر دباؤ بڑھ جاتا ہے، جس سے بوتل پھٹ سکتی ہے یا اس کے ٹکڑے گاڑی کے شیشے کو نقصان پہنچا سکتے ہیں۔
آٹو ماہرین کے مطابق بعض صورتوں میں بوتل کے دھماکے سے سامنے کا ونڈ اسکرین یا سائیڈ گلاس متاثر ہو سکتا ہے، جبکہ آتش گیر مواد ہونے کی وجہ سے گاڑی میں آگ بھڑکنے کا خطرہ بھی موجود رہتا ہے۔
شدید گرمی میں گاڑی کے اندر پرفیوم، ڈیوڈورنٹ، ایئر فریشنر یا لائٹر جیسی اشیا چھوڑنا خطرناک ثابت ہو سکتا ہے۔ بہتر ہے کہ ایسی اشیا گاڑی سے نکال لی جائیں یا ٹھنڈی جگہ پر رکھی جائیں۔
ماہرین نے شہریوں کو مشورہ دیا ہے کہ گاڑی پارک کرتے وقت سن شیڈ کا استعمال کریں، کھڑکیوں کو مناسب حد تک محفوظ رکھیں اور دباؤ والی یا آتش گیر اشیا گاڑی میں چھوڑنے سے گریز کریں۔
احتیاطی تدابیر اختیار کر کے نہ صرف گاڑی کو نقصان سے بچایا جا سکتا ہے بلکہ کسی بڑے حادثے کے امکان کو بھی کم کیا جا سکتا ہے۔
ماہرین کا کہنا ہے کہ گرمی کے موسم میں معمولی سی غفلت بھی مالی نقصان اور حادثات کا باعث بن سکتی ہے، اس لیے گاڑی میں رکھی اشیا کے انتخاب اور حفاظت پر خصوصی توجہ دینا ضروری ہے۔