استنبول(پاک ترک نیوز )ترکیہ کے دوسرے آئی کلاس فریگیٹ ٹی سی جی ازمیر (F-516) نے سمندری آزمائشی سفر شروع کر دیا ہے۔ نئے جنگی بحری جہاز میں پہلے فریگیٹ ٹی سی جی استنبول کے مقابلے میں زیادہ گہرا اور بڑا ورٹیکل لانچ سسٹم نصب کیا گیا ہے، جس سے مستقبل میں طویل فاصلے تک مار کرنے والے میزائلوں کی تنصیب کی صلاحیت پیدا ہو گئی ہے۔
ترکیہ کی انادولو شپ یارڈ کے مطابق ٹی سی جی ازمیر نے رواں ماہ 10 اگست کو ابتدائی سی ایکسیپٹنس ٹرائلز کے لیے سمندر میں سفر شروع کیا۔ یہ جہاز ترکیہ کے مقامی ملگیم پروگرام کے تحت تیار کیا جانے والا چھٹا بحری جنگی جہاز اور ترک بحریہ کے لیے چار آئی کلاس فریگیٹس میں سے دوسرا جہاز ہے۔
سی ٹرائلز کے دوران فریگیٹ کے انجن، سمندری کارکردگی، نیوی گیشن، سینسرز، پلیٹ فارم مینجمنٹ سسٹمز اور مقامی جنگی نظام کو عملی حالات میں جانچا جائے گا۔ شپ یارڈ کے مطابق جہاز میں مقامی نظاموں کا تناسب 80 فیصد سے زیادہ ہے۔
ٹی سی جی ازمیر کی سامنے آنے والی تصاویر میں اس کے اگلے حصے میں نصب MIDLAS ورٹیکل لانچ سسٹم میں اہم تبدیلی واضح طور پر دکھائی دیتی ہے۔ اگرچہ اس میں بھی 16 لانچ سیلز ہیں، تاہم اس کا ڈیزائن ٹی سی جی استنبول کے مقابلے میں زیادہ بڑا اور گہرا دکھائی دیتا ہے۔
یہ بھی پڑھیں :ترکیہ اور اسرائیل میں علاقائی اثر و رسوخ کی دوڑ، کشیدگی میں اضافہ
ماہرین کے مطابق یہ تبدیلی اسٹرائیک لینتھ وی ایل ایس کی طرف اشارہ کرتی ہے، جو نسبتاً بڑے اور طویل میزائلوں کو لانچ کرنے کی صلاحیت رکھتا ہے۔ اس میں مستقبل میں ترکیہ کے طویل فاصلے تک مار کرنے والے سیپر فضائی دفاعی میزائل کے علاوہ عمودی طور پر لانچ کیے جانے والے گزیگن کروز میزائل یا اتماجا اینٹی شپ میزائل شامل کیے جا سکتے ہیں۔
تاہم ترکیہ کی دفاعی صنعت کی ایجنسی یا شپ یارڈ نے تاحال وی ایل ایس کے تکنیکی حجم یا ٹی سی جی ازمیر پر ابتدائی طور پر نصب کیے جانے والے میزائلوں کی حتمی تفصیلات جاری نہیں کیں۔
آئی کلاس فریگیٹ پروگرام کا مقصد ترک بحریہ کے پرانے یاووز کلاس فریگیٹس کو جدید جنگی جہازوں سے تبدیل کرنا ہے۔ یہ فریگیٹس ملگیم پروگرام کے تحت تیار کیے گئے ہیں اور ایڈا کلاس کارویٹس کے بڑے اور جدید ورژن کے طور پر سامنے آئے ہیں۔
ٹی سی جی ازمیر سمیت آئی کلاس فریگیٹس کو فضائی دفاع، بحری جنگ، آبدوزوں کے خلاف کارروائی، سمندری نگرانی، الیکٹرانک وارفیئر اور خصوصی اقتصادی زون کے تحفظ سمیت متعدد مشنز کے لیے تیار کیا گیا ہے۔
اس فریگیٹ کی لمبائی تقریباً 113 میٹر، چوڑائی 14.4 میٹر اور وزن تقریباً 3 ہزار ٹن ہے، جبکہ اس کی زیادہ سے زیادہ رفتار 29 ناٹ سے زائد بتائی جاتی ہے۔ جہاز میں جدید ایڈونٹ کومبیٹ مینجمنٹ سسٹم، سینک ایس تھری ڈی اے ای ایس اے ریڈار، الیکٹرو آپٹیکل اور انفراریڈ سینسرز، سونار اور ٹارپیڈو کاؤنٹر میژرز بھی شامل ہیں۔
اس کے ہتھیاروں میں 16 سیل والا مقامی MIDLAS وی ایل ایس، 16 اتماجا اینٹی شپ میزائل، 76 ملی میٹر نیول گن، گوک دنیز کلوز اِن ویپن سسٹم، دو 25 ملی میٹر ریموٹ ویپن اسٹیشنز اور ٹارپیڈو ٹیوبز شامل ہیں۔
