کراچی (پاک ترک نیوز )میر رضا کیس سے متعلق جوڈیشل کمیشن کی رپورٹ جاری کر دی گئی، سندھ کابینہ نے رپورٹ منظر عام پر لانے کی منظوری دی تھی۔
رپورٹ میں میر رضا کیس کی تحقیقات کے لیے مشترکہ تحقیقاتی ٹیم بنانے کی سفارش کی گئی ہے، جس کی سربراہی ڈی آئی جی عرفان بلوچ کو سونپنے کی تجویز دی گئی ہے۔
جوڈیشل کمیشن نے ابتدائی دس روز کی تفتیش میں شامل پولیس افسران کے کردار کی اعلیٰ سطح پر تحقیقات کرنے کی سفارش بھی کی ہے۔ رپورٹ میں متعلقہ پولیس افسران کے خلاف محکمانہ کارروائی اور انکوائری کی تجویز دی گئی ہے۔
رپورٹ میں ابتدائی تفتیش کے دوران شواہد چھپانے کے معاملے کی تحقیقات کے لیے ڈی جی ایف آئی اے کی سربراہی میں کمیٹی قائم کرنے کی سفارش بھی کی گئی ہے۔
جوڈیشل کمیشن نے زور دیا ہے کہ میر رضا کیس کی تحقیقات شفاف، غیر جانب دارانہ اور حقائق پر مبنی ہونی چاہییں۔
