برمنگھم(پاک ترک نیوز )برمنگھم میں قومی فاسٹ بولر محمد عباس نے گفتگو کرتے ہوئے کہا ہے کہ کرکٹ میں کچھ بھی ممکن ہے اور نئی گیند سے وکٹیں حاصل کرنا ان کی خاص صلاحیت ہے۔ انہوں نے کہا کہ ٹیم نے بھرپور کوشش کی، تاہم مطلوبہ نتیجہ حاصل نہ ہوسکا۔
محمد عباس کا کہنا تھا کہ میچ کے دوران کیچز کے مواقع ضائع ہوئے، جبکہ بعض اوقات بولنگ میں نوبالز بھی ہوجاتی ہیں، جن کا نقصان ٹیم کو اٹھانا پڑتا ہے۔ ان کے مطابق سیریز ہاتھ سے نکل چکی تھی، اس کے باوجود تمام کھلاڑیوں نے اپنی جانب سے بھرپور کردار ادا کیا اور سخت محنت جاری رکھی۔
قومی فاسٹ بولر نے شائقین کی حوصلہ افزائی کو بھی سراہتے ہوئے کہا کہ رضا اللہ کے اسٹینڈ میں شائقین کا جوش دیکھ کر خوشی ہوئی۔ موسم گرم رہنے کی توقع تھی، تاہم ایسا نہیں ہوا اور کھلاڑیوں نے اپنی پوری کوشش کی۔
محمد عباس نے کہا کہ نتیجہ ہماری خواہش کے مطابق نہیں تھا، لیکن پوری ٹیم نے سخت محنت کی۔ انہوں نے اپنی فٹنس کے حوالے سے بتایا کہ وہ ٹرینر کے ساتھ کام کر رہے ہیں اور امید ہے کہ مستقبل میں مزید میچز کھیلنے کا موقع ملے گا۔
ان کا کہنا تھا کہ وہ نئی گیند سے وکٹیں حاصل کرنے کی اپنی صلاحیت کو برقرار رکھتے ہوئے ٹیم کے لیے مستقبل میں بھی مؤثر کردار ادا کرنے کے لیے پُرعزم ہیں۔
