لاہور( پاک ترک نیوز) لاہور سمیت پنجاب کے مختلف علاقوں میں مطلع ابر آلود ہے جبکہ اسلام آباد میں بھی بادلوں نے ڈیرے ڈال رکھے ہیں۔ محکمہ موسمیات کے مطابق صوبے میں آج سے 6 اگست تک مون سون کا ایک اور اسپیل متوقع ہے، جس کے دوران وقفے وقفے سے بارشیں ہونے کا امکان ہے۔
محکمہ موسمیات کا کہنا ہے کہ چترال، دیر، سوات، کوہستان، شانگلہ، بٹگرام، ایبٹ آباد اور وزیرستان سمیت خیبرپختونخوا کے مختلف علاقوں میں بھی بارش کی پیش گوئی کی گئی ہے۔
لاہور میں آج بھی سورج اور بادلوں کی آنکھ مچولی جاری رہنے کا امکان ہے، جبکہ شہر میں بارش متوقع ہے۔ صبح سویرے درجہ حرارت 28 ڈگری سینٹی گریڈ ریکارڈ کیا گیا اور گرمی کے ساتھ حبس کی کیفیت برقرار رہی۔ محکمہ موسمیات کے مطابق آج زیادہ سے زیادہ درجہ حرارت 35 ڈگری سینٹی گریڈ تک جا سکتا ہے۔
دوسری جانب کراچی میں بھی آج مطلع ابر آلود رہے گا، تاہم موسم گرم اور مرطوب رہنے کی توقع ہے۔ محکمہ موسمیات کے مطابق شہر میں تیز بارش کا امکان نہیں، البتہ کہیں کہیں بوندا باندی ہو سکتی ہے۔
یہ بھی پڑھیں: لاہور کے قریب بڑے صنعتی زون کے لیے 6 بینکوں سے مالی معاونت حاصل، منصوبہ تعمیراتی مرحلے میں داخل
کراچی میں موجودہ درجہ حرارت 29 ڈگری سینٹی گریڈ ریکارڈ کیا جا رہا ہے، جبکہ ہوا میں نمی کا تناسب 78 فیصد ہے۔ جنوب مغرب سے ہوائیں 18 کلومیٹر فی گھنٹہ کی رفتار سے چل رہی ہیں۔ شہر قائد میں آج زیادہ سے زیادہ درجہ حرارت 33 سے 35 ڈگری سینٹی گریڈ کے درمیان رہنے کا امکان ہے۔
