ریاض ( پاک ترک نیوز) سعودی عرب نے مشرق وسطیٰ میں کشیدگی اور طیاروں کی فراہمی میں تاخیر کے باوجود اپنی نئی قومی ایئرلائن ریاض ایئر کا باضابطہ آغاز کر دیا۔
ریاض ایئر کی پہلی پرواز لندن کے لیے اڑان بھر گئی ۔ سفید اور جامنی رنگ کے خصوصی ڈیزائن والے بوئنگ 787 ڈریم لائنر کی پرواز کے ساتھ سعودی عرب کے ویژن 2030 کے ایک اہم منصوبے کا عملی آغاز ہو گیا۔
ریاض ایئر سعودی عرب کی دوسری سرکاری ایئرلائن ہے، جبکہ پہلی قومی ایئرلائن سعودیہ جدہ میں قائم ہے۔ نئی ایئرلائن کا مقصد دارالحکومت ریاض کو عالمی فضائی مرکز بنانا ہے تاکہ وہ دبئی جیسے بین الاقوامی ایوی ایشن حب کا مقابلہ کر سکے۔
ایئرلائن کا آغاز اصل میں 2025 میں متوقع تھا، تاہم بوئنگ طیاروں کی فراہمی میں تاخیر اور دیگر تکنیکی مسائل کے باعث منصوبہ ایک سال سے زائد تاخیر کا شکار ہوا۔
سعودی حکومت ریاض میں ایک نئے بین الاقوامی ہوائی اڈے کی تعمیر بھی کر رہی ہے جس کی سالانہ گنجائش 2030 تک 12 کروڑ مسافروں تک پہنچ جائے گی، جبکہ موجودہ کنگ خالد انٹرنیشنل ایئرپورٹ سالانہ تقریباً 5 کروڑ 30 لاکھ مسافروں کو خدمات فراہم کرتا ہے۔
