واشنگٹن(پاک ترک نیوز ) امریکا نے ایران کو مزید معاشی طور پر تنہا کرنے کے لیے ایرانی ہوا بازی کے شعبے کے خلاف نئی سخت پابندیاں عائد کردی ہیں۔
امریکی محکمہ خزانہ کے مطابق تازہ کارروائی میں 27 ایرانی ایئر لائنز اور متعدد ہوا بازی کمپنیوں سمیت مجموعی طور پر 36 اہداف کو پابندیوں کا نشانہ بنایا گیا ہے۔
امریکی حکام کے مطابق پابندیوں کا مقصد ایران کی طیاروں، ہوا بازی کی ٹیکنالوجی اور دیگر حساس آلات تک رسائی روکنا ہے۔
امریکی محکمہ خزانہ کا کہنا ہے کہ تازہ اقدامات کے بعد ایران کی تمام ایئر لائنز امریکی پابندیوں کے دائرے میں آ گئی ہیں۔ واشنگٹن کے مطابق اس اقدام کا مقصد ایرانی معیشت کے پورے ہوا بازی کے شعبے کو عالمی منڈی سے مزید الگ کرنا ہے۔
امریکی حکام نے الزام عائد کیا ہے کہ تہران اپنے ہوا بازی کے شعبے کو ہتھیاروں، اہلکاروں اور غیر قانونی سامان کی نقل و حمل کے لیے استعمال کرتا رہا ہے۔
پابندیوں کا دائرہ صرف ایرانی کمپنیوں تک محدود نہیں رکھا گیا، بلکہ متحدہ عرب امارات، ترکیہ، ملائیشیا اور قازقستان میں کام کرنے والی متعدد کمپنیوں کو بھی نشانہ بنایا گیا ہے۔
امریکی حکام کے مطابق ان غیر ملکی کمپنیوں پر الزام ہے کہ انہوں نے فرنٹ کمپنیوں اور بین الاقوامی نیٹ ورک کے ذریعے ایران کو امریکی ساختہ طیارے اور حساس ہوا بازی ٹیکنالوجی فراہم کرنے میں مدد کی۔
اس کے علاوہ ماہان ایئر کی بیرون ملک کارروائیوں میں معاونت کرنے والے کارگو سروس فراہم کنندگان اور جنرل سیلز ایجنٹس بھی نئی پابندیوں کی زد میں آ گئے ہیں۔
واشنگٹن کا کہنا ہے کہ تازہ پابندیاں ایران کے ہوا بازی کے شعبے اور اس سے منسلک بین الاقوامی نیٹ ورک پر مالی اور عملی دباؤ مزید بڑھانے کے لیے عائد کی گئی ہیں۔
