اسلام آباد(پاک ترک نیوز) پاکستان انٹرنیشنل ایئرلائنز کے نئے چیف ایگزیکٹو آفیسر کے لیے نیوزی لینڈ سے تعلق رکھنے والے ایڈریان ہیملٹن مینز کو نامزد کر دیا گیا ہے۔ ذرائع کے مطابق ان کی باقاعدہ تعیناتی متعلقہ قواعد و ضوابط اور ضروری تقاضوں کی تکمیل سے مشروط ہے۔ذرائع کا کہنا ہے کہ ایڈریان ہیملٹن مینز کو بین الاقوامی فضائی صنعت میں تقریباً 28 سال کا تجربہ حاصل ہے اور وہ مختلف عالمی فضائی کمپنیوں میں اہم انتظامی عہدوں پر خدمات انجام دے چکے ہیں۔ایڈریان ہیملٹن مینز اس سے قبل عمان کی کم لاگت فضائی کمپنی سلام ایئر کے چیف ایگزیکٹو آفیسر رہ چکے ہیں۔ انہوں نے جولائی 2024 میں یہ عہدہ سنبھالا تھا۔ سلام ایئر سے قبل وہ قازقستان کی فضائی کمپنی فلائی آریستان کے صدر اور چیف ایگزیکٹو آفیسر کے طور پر بھی کام کر چکے ہیں۔
یہ بھی پڑھیں: گونر کا خیبرپختونخوا پولیس کے شہداء کے معاوضوں میں اضافے کا اعلان
ان کے پیشہ ورانہ تجربے میں ورجن آسٹریلیا، انڈیگو اور ساؤتھ افریقن ایئرویز سمیت متعدد بین الاقوامی فضائی کمپنیوں میں اہم عہدوں پر خدمات انجام دینا شامل ہے۔ذرائع کے مطابق ایڈریان ہیملٹن مینز کی نامزدگی پی آئی اے کی انتظامی قیادت کے حوالے سے ایک اہم پیش رفت ہے، تاہم نئے چیف ایگزیکٹو آفیسر کی باقاعدہ تعیناتی کے لیے متعلقہ قواعد و ضوابط اور دیگر ضروری تقاضے مکمل کیے جائیں گے۔
