لاہور: (پاک ترک نیوز)پاکستان سپر لیگ (پی ایس ایل) میں توسیع کا اہم مرحلہ آج طے ہونے جا رہا ہے، جہاں لیگ کی دو نئی ٹیموں کی نیلامی جناح کنونشن سینٹر لاہور میں منعقد ہوگی۔
نیلامی کی تقریب شام 4 بج کر 15 منٹ پر شروع ہوگی، جس میں ملک کی 10 بڑی کمپنیاں حصہ لے رہی ہیں۔پاکستان کرکٹ بورڈ کے مطابق نئی فرنچائزز کی نیلامی اوپن آکشن کے ذریعے کی جائے گی۔
نیلامی کا آغاز ریزرو پرائس کے اعلان سے ہوگا، جس کا باضابطہ اعلان تقریب سے قبل کیا جائے گا۔ نیلامی کا عمل دو مرحلوں پر مشتمل ہوگا اور بولیاں ریئل ٹائم میں لگائی جائیں گی تاکہ شفافیت کو یقینی بنایا جا سکے۔
سب سے زیادہ بولی دینے والی کمپنی نہ صرف پی ایس ایل فرنچائز حاصل کرے گی بلکہ اسے پہلے شہر کے انتخاب کا خصوصی حق بھی دیا جائے گا۔
کامیاب بولی دہندگان کو فرنچائز کے حقوق 10 سال کے لیے دیے جائیں گے، جو سال 2035 تک مؤثر رہیں گے۔ پاکستان کرکٹ بورڈ فرنچائز فیس کی مد میں ایک مرتبہ 10 لاکھ امریکی ڈالر وصول کرے گا۔پی ایس ایل کی نئی ٹیموں کے لیے فیصل آباد، گلگت، حیدرآباد، مظفرآباد، راولپنڈی اور سیالکوٹ کو ممکنہ شہروں کی فہرست میں شامل کیا گیا ہے۔
تاہم اگر کوئی کمپنی اس فہرست سے ہٹ کر کسی اور شہر کا انتخاب کرتی ہے تو اسے اضافی فیس ادا کرنا ہوگی۔دو نئی فرنچائزز کے حصول کے لیے جن کمپنیوں کے درمیان مقابلہ ہوگا ان میں ایم نیکسٹ، ڈہرکی شوگر ملز، ایف کے ایس، پرزم ڈیولپرز، انوریکس سولر، جاز، آئی ٹو سی، ولی ٹیکنالوجیز، ویگو ٹیل اور اوزی ڈویلپرز شامل ہیں۔
نئی ٹیموں کی شمولیت کے بعد پی ایس ایل سیزن 11 میں ٹیموں کی تعداد 6 سے بڑھ کر 8 ہو جائے گی۔ پی ایس ایل سیزن 11 کا آغاز 26 مارچ 2026 سے ہوگا جبکہ فائنل میچ 3 مئی 2026 کو کھیلا جائے گا۔نیلامی کی تقریب کے اختتام پر معروف گلوکار راحت فتح علی خان خصوصی پرفارمنس پیش کریں گے، جبکہ پاکستان شاہینز اور ہانگ کانگ سپر سکسز کی فاتح ٹیموں کو بھی انعامات سے نوازا جائے گا۔
