اسلام آباد (پاک ترک نیوز )وزیرِ اعظم شہباز شریف نے غزہ کے فلسطینی عوام کو بنیادی انسانی امداد کی فراہمی میں رکاوٹوں پر شدید تشویش کا اظہار کرتے ہوئے اسرائیل کے اقدامات کی مذمت کی ہے۔سماجی رابطے کی ویب سائٹ پر اپنے پیغام میں وزیرِ اعظم کا کہنا تھا کہ غزہ کے بہادر فلسطینی عوام تک بنیادی انسانی امداد پہنچنے سے روکنے کے لیے اسرائیل کی جانب سے جاری غیر قانونی اقدامات باعثِ تشویش ہیں۔شہباز شریف نے کہا کہ غزہ سے سامنے آنے والے مناظر دل دہلا دینے والے ہیں، جہاں فلسطینیوں کے خیمے بارش کے پانی میں ڈوب رہے ہیں، جبکہ بے گھر بچے کہیں اور جانے کی جگہ نہ ہونے کے باعث بھوک اور شدید سردی کا سامنا کر رہے ہیں۔
یہ بھی پڑھیں: بلاول بھٹو زرداری کا علامہ اقبال کے یومِ ولادت پر خراجِ عقیدت، افکار کو قومی زندگی کا حصہ بنانے پر زور
وزیرِ اعظم نے جنگ بندی اور بین الاقوامی قانون کی خلاف ورزیوں سمیت فلسطینی عوام کے خلاف جاری اسرائیلی جارحیت کی شدید مذمت کی۔انہوں نے بتایا کہ وزارتِ خارجہ کو ہدایت جاری کی گئی ہے کہ غزہ کے متاثرین کے لیے انسانی امداد میں فوری اضافے کی غرض سے تمام ممکنہ ذرائع بروئے کار لائے جائیں۔
