اسلام آباد ( پاک ترک نیوز) ملک بھر میں موسم کے حوالے سے ایک اہم پیش رفت سامنے آئی ہے۔ ماہرین موسمیات نے پیش گوئی کی ہے کہ یکم جولائی سے پری مون سون بارشوں کا نیا سلسلہ شروع ہونے کا امکان ہے، جس سے کئی علاقوں میں موسم خوشگوار ہوگا، تاہم اس کے ساتھ قدرتی آفات کے خدشات بھی بڑھ گئے ہیں۔
محکمہ موسمیات کے مطابق رواں سال پری مون سون بارشوں کا آغاز شمال مشرقی پنجاب اور آزاد کشمیر سے متوقع ہے۔ بعد ازاں یہ سلسلہ ملک کے بالائی علاقوں اور پنجاب کے دیگر شمال مشرقی اضلاع تک پھیل سکتا ہے، جہاں مختلف مقامات پر تیز بارشیں ہونے کی توقع ظاہر کی گئی ہے۔
ان بارشوں سے اگرچہ شدید گرمی کی شدت میں کمی آئے گی، لیکن متعلقہ اداروں نے ممکنہ خطرات کے پیش نظر عوام کو احتیاط برتنے کی ہدایت بھی جاری کر دی ہے۔
قومی ادارہ برائے قدرتی آفات، این ڈی ایم اے، نے خبردار کیا ہے کہ حالیہ شدید گرمی کے باعث پہاڑوں پر موجود برف اور گلیشیئر پہلے ہی تیزی سے پگھل رہے ہیں، جبکہ متوقع بارشیں اس عمل کو مزید تیز کر سکتی ہیں۔
یہ بھی پڑھیں: ایل نینو دنیا کیلئے نیا خطرہ
این ڈی ایم اے کے مطابق جولائی کے پہلے ہفتے کے دوران گلیشیئر جھیلیں پھٹنے، اچانک سیلاب، ندی نالوں میں طغیانی اور پہاڑی علاقوں میں لینڈ سلائیڈنگ جیسے خطرات میں نمایاں اضافہ ہو سکتا ہے۔
حکام کا کہنا ہے کہ خصوصاً گلگت بلتستان، خیبر پختونخوا اور آزاد کشمیر میں گلیشیئر پگھلنے سے دریاؤں اور ندی نالوں میں پانی کے بہاؤ میں غیر معمولی اضافہ متوقع ہے، جس کے باعث پانی کی سطح اچانک بلند ہو سکتی ہے۔
صورتحال کے پیش نظر متعلقہ اداروں نے سیاحوں، مسافروں اور مقامی آبادی کو ہدایت کی ہے کہ وہ دریا کناروں، گلیشیئر سے نکلنے والے ندی نالوں اور دیگر حساس مقامات سے غیر ضروری طور پر دور رہیں اور انتظامیہ کی جانب سے جاری کردہ حفاظتی ہدایات پر مکمل عمل کریں تاکہ کسی بھی ممکنہ حادثے یا جانی نقصان سے بچا جا سکے۔
