کیلیفورنیا ( پاک ترک نیوز) امریکی خلائی ادارے ناسا نے نئے تجرباتی طیارے ’ایکس 70 فریکٹل‘ کی تیاری کا عندیہ دے دیا ہے، جس کے ذریعے جدید فضائی ٹیکنالوجی اور پرواز کے کنٹرول سے متعلق اہم تجربات کیے جائیں گے۔یہ کوئی عام مسافر بردار طیارہ نہیں بلکہ ایک ایسا جدید تجرباتی پلیٹ فارم ہوگا جس کے ذریعے پرواز کے کنٹرول، طیارے کی غیر معمولی نقل و حرکت اور جدید ایوی ایشن ٹیکنالوجی کے تجربات کیے جائیں گے۔
ناسا کے مطابق ایکس 70 فریکٹل میں ایسا جدید فلائٹ کنٹرول سسٹم نصب ہوگا جسے تیزی سے تبدیل اور مختلف تجربات کے مطابق ترتیب دیا جا سکے گا۔ اس ٹیکنالوجی کی مدد سے سائنس دان یہ جانچ سکیں گے کہ انسانی پائلٹ کے زیرِ کنٹرول طیارے کو کس حد تک غیر معمولی انداز میں حرکت دی جا سکتی ہے۔یہی نہیں، اس طیارے کا ڈیزائن بھی خاص طور پر تجربات کے لیے تیار کیا گیا ہے۔ اس میں اندرونی اور بیرونی حصوں میں تقریباً 2 ہزار پاؤنڈ تک تجرباتی آلات اور سامان لے جانے کی گنجائش ہوگی۔ ضرورت کے مطابق ان آلات کو تبدیل بھی کیا جا سکے گا، جس سے مختلف سائنسی تجربات کے لیے الگ الگ طیارے تیار کرنے کی ضرورت کم ہو سکتی ہے۔
ناسا کے مطابق ایکس 70 فریکٹل کا مجموعی ٹیک آف وزن تقریباً 10 ہزار پاؤنڈ ہوگا، جبکہ اس کی رفتار میک 0.75 تک پہنچ سکے گی۔ یہ طیارہ 45 ہزار فٹ کی بلندی پر پرواز کرنے کی صلاحیت رکھے گا اور اس کی رینج تقریباً 2 ہزار 778 کلومیٹر سے زیادہ ہوگی۔یعنی یہ طیارہ آواز کی رفتار سے تیز پرواز کرنے کے لیے نہیں بلکہ جدید فلائٹ کنٹرول اور فضائی نقل و حرکت کی ٹیکنالوجی آزمانے کے لیے بنایا جا رہا ہے۔
یہ بھی پڑھیں: امریکی عوام فتح سے کم کچھ قبول نہیں کریں گے، پیٹ ہیگستھ
ناسا کے ایڈمنسٹریٹر جیرڈ آئزک مین کا کہنا ہے کہ اس طیارے کا ماڈیولر ڈیزائن اور مختلف تجرباتی آلات کو تیزی سے تبدیل کرنے کی صلاحیت سائنس دانوں کو نئے تجربات کرنے میں مدد دے گی۔ ناسا کو توقع ہے کہ یہ طیارہ اگلے دو سال کے اندر ادارے کے نام سے اپنی پہلی پرواز کرے گا۔ناسا کے مطابق ایکس 70 کے ذریعے مستقبل کے طیاروں کے لیے جدید فلائٹ کنٹرول، بہتر نقل و حرکت اور دیگر جدید ٹیکنالوجیز کی جانچ کی جائے گی۔
