واشنگٹن (پاک ترک نیوز )امریکی فضائیہ نے اپنے بی ون بی لانسر اسٹریٹجک بمبار طیاروں کے پائلٹس کی تربیت اور پرواز کا تجربہ بڑھانے کے لیے جاپانی کمپنی ہونڈا کے تیار کردہ چھوٹے کاروباری طیارے ہونڈا جیٹ استعمال کرنا شروع کردیے ہیں۔
نومبر کے آغاز میں پہلے بی ون بی لانسر طیاروں کے پائلٹس نے نئے تربیتی منصوبے کے تحت ہونڈا ایچ اے 420 طیاروں پر پروازیں شروع کیں۔ اس منصوبے کو بمبار عملے کی تربیت اور پرواز کی صلاحیت برقرار رکھنے کے لیے تیار کیا گیا ہے۔
امریکی فضائیہ نے نجی کمپنی ایکس اسٹار ایوی ایشن کے ساتھ معاہدہ کیا ہے، جس کے تحت نجی ملکیت اور انتظام میں چلنے والے ہونڈا جیٹ طیارے امریکی فضائیہ کے پائلٹس کو اضافی تربیت فراہم کریں گے۔یہ طیارے ٹیکساس کے ایبلین علاقائی ہوائی اڈے سے پروازیں کررہے ہیں، جو ڈائس فضائی اڈے کے قریب واقع ہے۔اس منصوبے کا بنیادی مقصد یہ ہے کہ بی ون بی لانسر کے پائلٹس کو معمول کی پرواز، موسمی حالات، فضائی راستوں اور فوری فیصلے کرنے کی مشق کے لیے ہر مرتبہ بھاری بمبار طیارے استعمال نہ کرنا پڑیں۔
اس طرح اصل بمبار طیاروں کو خصوصی جنگی تربیت اور عملی فوجی ذمہ داریوں کے لیے دستیاب رکھا جاسکے گا۔امریکی فضائیہ کی گلوبل اسٹرائیک کمانڈ کے سربراہ جنرل اسٹیفن ڈیوس کے مطابق فضائی عملے کی جنگی تیاری کے لیے بنیادی پرواز کی مہارت، درست فیصلے اور فضائی تجربہ انتہائی اہم ہیں۔ان کا کہنا تھا کہ نیا منصوبہ کم لاگت میں پائلٹس کو اضافی پرواز کے مواقع فراہم کرے گا اور انہیں بی ون طیاروں پر خصوصی تربیت کے لیے بہتر طور پر تیار کرے گا۔ساتویں بم ونگ کے کمانڈر کرنل رابرٹ اسٹرجِل کے مطابق اس منصوبے کے تحت پائلٹس کو ہر سال تقریباً 100 اضافی گھنٹے فضا میں پرواز کا موقع مل سکے گا۔ہونڈا جیٹ ایک چھوٹا کاروباری طیارہ ہے، جس کی پرواز اور دیکھ بھال کا خرچ بی ون بی لانسر جیسے بڑے جنگی بمبار کے مقابلے میں نمایاں طور پر کم ہے۔
بی ون بی لانسر چار طاقتور انجنوں اور متحرک پروں والا بھاری بمبار طیارہ ہے، جس کی دیکھ بھال بھی پیچیدہ اور مہنگی ہے۔نئے منصوبے کے تحت ہونڈا جیٹ کی دیکھ بھال کی ذمہ داری نجی کمپنی کے پاس ہوگی، جس سے امریکی فضائیہ کے تکنیکی عملے پر اضافی بوجھ بھی کم ہوگا۔تاہم ہتھیاروں کے استعمال، فضا میں ایندھن بھرنے اور جنگی حکمت عملی سے متعلق خصوصی تربیت بدستور اصل بی ون بی لانسر طیاروں پر ہی کی جائے گی۔ہونڈا نے 2006 میں اپنی ذیلی کمپنی ہونڈا ایئرکرافٹ کمپنی کے ذریعے طیارہ سازی کے شعبے میں قدم رکھا تھا۔ کمپنی کا صدر دفتر امریکی ریاست شمالی کیرولائنا میں ہے اور اس کے طیارے امریکا ہی میں تیار کیے جاتے ہیں۔
یہ بھی پڑھیں: ایمیزون کا گھروں اور کاروباری مراکز کی نگرانی کے لیے اڑنے والا ڈرون اور خودکار سکیورٹی روبوٹ متعارف
ہونڈا جیٹ میں زیادہ سے زیادہ چھ مسافروں کی گنجائش ہے۔ اس کا ڈھانچہ مرکب مواد سے تیار کیا گیا ہے جبکہ پروں میں ایلومینیم استعمال ہوتا ہے۔اس طیارے کے دو خصوصی جی ای ہونڈا ایچ ایف 120 جیٹ انجن پروں کے اوپر نصب کیے گئے ہیں، جو اسے دوسرے کاروباری طیاروں سے منفرد شکل دیتے ہیں۔
کمپنی اس کے بڑے اور زیادہ فاصلے تک پرواز کرنے والے نئے ماڈل ایچ اے 480 پر بھی کام کررہی ہے، جسے ایچلون کا نام دیا گیا ہے۔
