اسلام آباد ( پاک ترک نیوز) وزیراعظم شہباز شریف نے پٹرولیم ریلیف سکیم کے تحت عوام کو سبسڈی کے حصول میں آسانی فراہم کرنے کے لیے سہولت ڈیسک قائم کرنے کی ہدایت کردی۔وزیراعظم کی زیر صدارت پٹرولیم ریلیف سکیم سے متعلق خصوصی اجلاس ہوا، جس میں انہیں فیول سبسڈی سکیم پر پیش رفت کے حوالے سے تفصیلی بریفنگ دی گئی۔وزیراعظم نے ہدایت کی کہ عوام کو سبسڈی کے حصول کے لیے رجسٹریشن سمیت دیگر ضروری مراحل میں ہر ممکن رہنمائی اور معاونت فراہم کی جائے۔شہباز شریف نے کہا کہ پٹرولیم ریلیف سکیم کا مقصد عوام کو ریلیف فراہم کرنا ہے، اس لیے انتظامی امور کو آسان اور عوام دوست بنایا جائے۔
یہ بھی پڑھیں: پیٹرولیم مصنوعات کی قیمتوں میں ایک اور بڑا اضافہ، پیٹرول 391 روپے سے تجاوز کرگیا
وزیراعظم نے انتظامیہ، رضاکاروں اور پٹرول پمپ کے عملے پر مشتمل سہولت ڈیسک قائم کرنے کی ہدایت کرتے ہوئے کہا کہ شہریوں کو رجسٹریشن اور سبسڈی کے حصول کے تمام مراحل میں رہنمائی فراہم کی جائے۔اجلاس میں سکیم پر عمل درآمد، عوامی سہولت اور رجسٹریشن کے طریقہ کار سے متعلق امور کا بھی جائزہ لیا گیا۔
