راولپنڈی (پاک ترک نیوز) راولپنڈی میں چین کی پیپلز لبریشن آرمی کے 99ویں یومِ تاسیس کی تقریب سے خطاب کرتے ہوئے چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر نے کہا کہ پاک چین دوستی منفرد، آزمودہ اور ہر مشکل وقت میں مضبوط ثابت ہوئی ہے۔ انہوں نے کہا کہ پاکستان کی مسلح افواج اور چین کی پیپلز لبریشن آرمی باہمی اعتماد، غیر متزلزل تعاون اور خطے میں امن، استحکام اور مشترکہ تزویراتی مفادات کے تحفظ کے لیے ایک دوسرے کی حقیقی شراکت دار ہیں۔
فیلڈ مارشل عاصم منیر نے چین کی پیپلز لبریشن آرمی کی قومی دفاع، ترقی اور عالمی امن و سلامتی کے لیے خدمات کو خراجِ تحسین پیش کرتے ہوئے اس کے 99ویں یومِ تاسیس پر مبارک باد بھی دی۔
جنرل ہیڈکوارٹر میں منعقدہ تقریب میں پاکستان میں چین کے سفیر جیانگ زائی ڈونگ نے بطور مہمانِ خصوصی شرکت کی، جبکہ چین کے دفاعی اتاشی، چینی سفارت خانے کے حکام اور پاکستان کی تینوں مسلح افواج کے سینئر افسران بھی موجود تھے۔
یہ بھی پڑھیں: امریکہ اور اسرائیل کا ایران کی توانائی کی تنصیبات پر حملے کا منصوبہ تیار
اس موقع پر چینی سفیر نے تقریب کے انعقاد پر فیلڈ مارشل عاصم منیر کا شکریہ ادا کرتے ہوئے دہشت گردی کے خلاف جنگ میں پاکستان کی مسلح افواج کی قربانیوں اور خدمات کو سراہا۔ انہوں نے پاکستان کی غیر متزلزل حمایت اور دونوں ممالک کے درمیان ہر موسم کی تزویراتی تعاون پر مبنی شراکت داری کو مزید مضبوط بنانے کے عزم کا بھی اعادہ کیا۔
