لاہور(پاک ترک نیوز) امیر جماعت اسلامی حافظ نعیم الرحمان نے کہا ہے کہ حکومت نے عوام کے بنیادی حقوق پر ڈاکا ڈالا ہوا ہے، حکومت نے 4 ہزار ارب روپے سے زائد پٹرولیم لیوی وصول کی، شہباز شریف بتائیں یہ رقم کہاں خرچ کی گئی۔
لاہور میں نیوز کانفرنس کرتے ہوئے حافظ نعیم الرحمان نے کہا کہ جماعت اسلامی کے دھرنے کوئی ذاتی مسئلہ نہیں بلکہ عوام کے لیے ہیں۔ ملک میں صحت، تعلیم اور دیگر بنیادی سہولیات تک عوام کو مناسب رسائی حاصل نہیں۔انہوں نے کہا کہ آئی پی پیز کو اس بجلی کے پیسے دیے جاتے ہیں جو بنتی ہی نہیں، ایف بی آر اپنے اہداف پورے نہیں کرتا جبکہ قوم سرکاری افسران کو پال رہی ہے۔ عوام کے پیسوں سے صرف چند افراد کا پیٹ بھرا جا رہا ہے۔
یہ بھی پڑھیں: یوفون، ٹیلی نار ری برانڈنگ کی مشروط منظوری
حافظ نعیم الرحمان نے کہا کہ یاسین ملک کا خط دیکھ کر ہمیں انتہائی دکھ ہوا، بھارت میں یاسین ملک کو بدترین عدالتی قتل کی طرف لے کر جایا جا رہا ہے۔انہوں نے کہا کہ پاکستان نے یاسین ملک کے معاملے میں کوئی کردار ادا نہیں کیا، اگر ہم یاسین ملک کا مقدمہ نہیں لڑ سکتے تو اس کا مطلب ہے کہ ہم کشمیر کا مقدمہ کمزور کر رہے ہیں۔امیر جماعت اسلامی نے مطالبہ کیا کہ بھارت کے ساتھ یاسین ملک کا مقدمہ بھرپور انداز میں لڑا جائے۔حافظ نعیم الرحمان نے صومالیہ میں پاکستانی یرغمالیوں کا معاملہ بھی اٹھاتے ہوئے کہا کہ انہیں یرغمال بنائے چار ماہ گزر چکے ہیں لیکن اب تک بازیاب نہیں کرایا جاسکا۔انہوں نے بتایا کہ وزارتِ داخلہ، وزارتِ خارجہ سمیت تمام متعلقہ اداروں سے رابطہ کیا، ترکیہ نے اپنے شہریوں کو بازیاب کرا لیا لیکن پاکستان میں کسی نے اس معاملے پر بات تک نہیں کی۔
حافظ نعیم الرحمان نے مطالبہ کیا کہ صومالیہ میں یرغمال بنائے گئے پاکستانیوں کو فوری بازیاب کرایا جائے، یہ پاکستان کی عزت کا سوال ہے۔
