اسلام آباد ( پاک ترک نیوز) نائب وزیراعظم اسحاق ڈار دورہ مصر مکمل کر کے اسلام آباد واپس پہنچ گئے،ترجمان دفتر خارجہ کے مطابق اسحاق ڈار نے مصری وزیر خارجہ کی دعوت پر 20 سے 21 جون تک قاہرہ کا دورہ کیا۔
اسحاق ڈار نے قاہرہ میں آر-4 وزارتی اجلاس میں شرکت کی، اجلاس میں مصر، سعودی عرب اور ترکیہ کے وزرائے خارجہ شریک ہوئے۔آر-4 اجلاس میں نائب وزیراعظم اسحاق ڈار نے اہم علاقائی اور عالمی امور پر وزرائے خارجہ سے تبادلہ خیال کیا۔
اسحاق ڈار نے مذاکرات، تعاون اور مشترکہ چیلنجز سے نمٹنے کے لیے اجتماعی کوششوں کے پاکستان کے عزم کا اعادہ کیا۔
ترجمان دفتر خارجہ کے مطابق نائب وزیراعظم اسحاق ڈار نے مصر، سعودی عرب اور ترکیہ کے وزرائے خارجہ کے ہمراہ صدر مصر عبدالفتاح السیسی سے ملاقات کی، صدر، وزیراعظم اور چیف آف ڈیفنس فورسز کی جانب سے صدر السیسی کو گرمجوشی کے پیغامات اور نیک خواہشات پہنچائیں
نائب وزیراعظم نے پاکستان اور مصر کے درمیان دیرینہ، برادرانہ اور کثیرالجہتی تعلقات کو مزید مضبوط بنانے کے عزم کا اعادہ کیا،صدر مصر عبدالفتاح السیسی نے وزیراعظم پاکستان کی جانب سے دورہ پاکستان کی دعوت قبول کرلی۔نائب وزیراعظم اسحاق ڈار کی مصری وزیر خارجہ بدر عبدالعاطی سے دوطرفہ ملاقات بھی ہوئی۔
یہ بھی پڑھیں: ازبک وزیر خارجہ کا اسحاق ڈار سے رابطہ ، اسلام آباد مفاہمتی یادداشت پر دستخط پر مبارکباد
ترجمان دفتر خارجہ کے مطابق پاکستان اور مصر کے وزرائے خارجہ نے دوطرفہ تعلقات کے تمام پہلوؤں کا جائزہ لیا،اسحاق ڈار اور بدر عبدالعاطی نے تجارت، سرمایہ کاری، تعلیم، ثقافت اور عوامی روابط میں تعاون بڑھانے پر اتفاق کیا۔
ترجمان دفتر خارجہ کے مطابق پاکستان اور مصر کے وزرائے خارجہ نے دوطرفہ تعاون مزید بڑھانے کے لیے موجودہ ادارہ جاتی میکنزمز کو دوبارہ فعال کرنے پر اتفاق کیا ،دونوں وزرائے خارجہ نے دوطرفہ اور کثیرالجہتی سطح پر قریبی رابطوں اور مشاورت جاری رکھنے کے عزم کا اعادہ کیا
