ریاض ( پاک ترک نیوز) سعودی عرب نے حوثی ملیشیا کے ڈرون اور میزائل حملوں کی کوششیں ناکام بنانے کا دعویٰ کیا ہے، سعودی اتحادی افواج کے مطابق ریاض اور جنوبی علاقوں کو نشانہ بنانے والے ڈرونز تباہ کر دیے گئے، جبکہ ریاض کی جانب داغا گیا بیلسٹک میزائل حملہ بھی ناکام بنا دیا گیا۔ترجمان کے مطابق سعودی اتحادی افواج نے مجموعی طور پر تین بیلسٹک میزائل اور چار ڈرونز تباہ کیے۔ مشرقی علاقے اور الخرج گورنری میں خطرہ ٹلنے کے بعد ہنگامی الرٹ واپس لے لیا گیا۔
یہ بھی پڑھیں: مکہ دفاعی اتحاد کا تہران میں اجلاس،امن کے لیے مشترکہ کوششیں بڑھانے پر اتفاق
دوسری جانب سعودی اتحادی افواج نے یمن میں حوثیوں کے زیرِقبضہ علاقوں پر حملے کیے، جن میں بیلسٹک میزائل ذخیرہ کرنے کے پانچ مقامات اور چار لانچنگ پلیٹ فارمز تباہ کرنے کا دعویٰ کیا گیا ہے۔ادھر یمنی فوج نے حوثیوں کے خلاف آپریشن ’’فجر الیمن‘‘ جاری رکھنے کا اعلان کیا ہے۔ یمنی فوج کے مطابق گزشتہ 24 گھنٹوں کے دوران مختلف محاذوں پر حوثیوں کے خلاف ایک ہزار 276 حملے کیے گئے، جن میں ان کی تنصیبات اور ٹھکانوں کو نشانہ بنایا گیا۔
