تہران ( پاک ترک نیوز) ایرانی صدر مسعود پزشکیان نے کہا ہے کہ ایران خطے میں اختلافات ختم کرنے اور اسلامی ممالک کے درمیان اتحاد، سلامتی اور تعاون بڑھانے کے لیے تیار ہے۔صدر پزشکیان نے مسلم ممالک پر زور دیا کہ وہ باہمی اختلافات بھلا کر مشترکہ مفادات اور خطے میں پائیدار امن کے لیے مل کر کام کریں۔انہوں نے غزہ، لبنان، ایران اور مشرقِ وسطیٰ کے دیگر علاقوں پر اسرائیلی حملوں کی شدید مذمت کرتے ہوئے کہا کہ مسلم ممالک کا اتحاد اسرائیلی جارحیت روکنے میں اہم کردار ادا کر سکتا ہے۔
ایرانی صدر کا کہنا تھا کہ اسلامی ممالک کو حملوں اور عدم تحفظ کے خلاف مشترکہ حکمت عملی اپنانی چاہیے اور خطے کو تقسیم کرنے کی کوششوں کا مقابلہ کرنے کے لیے علاقائی تعاون مضبوط بنانا چاہیے۔
یہ بھی پڑھیں: ایران خطے میں اختلافات ختم کرنے اور اسلامی ممالک سے تعاون بڑھانے کے لیے تیار، صدر پزشکیان
ایران کے جوہری پروگرام سے متعلق صدر پزشکیان نے واضح کیا کہ ایران جوہری ہتھیار بنانے کا ارادہ نہیں رکھتا، تاہم بین الاقوامی قانون اور جوہری عدم پھیلاؤ کے معاہدے کے تحت پُرامن جوہری سرگرمیاں جاری رکھنے کا اپنا حق محفوظ رکھتا ہے۔صدر پزشکیان نے مزید کہا کہ ایران کو ہتھیار ڈالنے پر مجبور کرنے کا تصور غلط ہے۔ ایران اسلامی ممالک کے اتحاد، سلامتی اور ترقی کے لیے ہر ایسے معاہدے کی حمایت کرے گا جو خطے میں امن و استحکام کے فروغ میں مددگار ہو۔
