انقرہ ( پاک ترک نیوز) ترکیہ میں سرمایہ کاری فنڈز کے بحران اور مالیاتی بے ضابطگیوں کی تحقیقات کے دوران بینکنگ ریگولیٹری ادارے کے سربراہ شاہاپ کاوجی اوغلو نے اپنے عہدے سے مستعفی ہونے کی درخواست صدر رجب طیب اردوان کو پیش کردی۔شاہاپ کاوجی اوغلو کا کہنا ہے کہ بینکنگ ریگولیشن اینڈ سپروائزری ایجنسی اور ان کی ذات سے متعلق حالیہ الزامات کے باعث انہوں نے عہدہ چھوڑنے کا فیصلہ کیا، تاکہ ادارے کو مزید نقصان نہ پہنچے۔
میڈیا رپورٹس میں ان پر سرمایہ کاری فنڈز میں رقم لگانے اور رشوت لینے کے الزامات سامنے آئے تھے، تاہم انہوں نے ان الزامات کی تردید کرتے ہوئے کہا کہ بینکنگ ریگولیٹری ادارے کا فنڈز بحران سے کوئی تعلق نہیں۔دوسری جانب تحقیقات کے سلسلے میں ادارے کے اعلیٰ حکام کو گزشتہ ہفتے گرفتار کیا گیا، جنہیں بعد ازاں ٹرائل مکمل ہونے تک جیل بھیج دیا گیا۔
یہ بھی پڑھیں: چھوٹے شاہین بھارت سورمائوں کو ایک بار پھر دھول چٹانے کیلئے تیار
ستمبر میں ترک ریگولیٹرز نے سات اثاثہ جات انتظامی کمپنیوں کے زیر انتظام 131 سرمایہ کاری فنڈز ختم کرنے کا حکم دیا تھا۔ یہ فنڈز محض تین برس میں 20 ارب ڈالر سے زائد کے اثاثوں تک پہنچ گئے تھے، جبکہ ان میں تقریباً پانچ لاکھ سرمایہ کاروں نے رقم لگا رکھی تھی۔حکام 400 سے زائد مشتبہ افراد کے خلاف تحقیقات کر رہے ہیں۔واضح رہے کہ شاہاپ کاوجی اوغلو 2021 سے 2023 تک ترکیہ کے مرکزی بینک کے گورنر بھی رہ چکے ہیں۔
