پشاور ( پاک ترک نیوز) وزیراعلیٰ خیبرپختونخوا محمد سہیل آفریدی نے کوہاٹ اولڈ پولیس لائنز میں ہونے والے دھماکے کا نوٹس لیتے ہوئے واقعے کی شدید مذمت کی ہے۔وزیراعلیٰ نے پولیس حکام سے دھماکے کی تفصیلی رپورٹ طلب کرلی اور ہدایت کی کہ واقعے کے تمام پہلوؤں کا جائزہ لے کر مکمل رپورٹ پیش کی جائے۔محمد سہیل آفریدی نے کہا کہ دہشت گردی کا یہ بزدلانہ واقعہ انتہائی افسوسناک اور ناقابل قبول ہے، معصوم شہریوں کو نشانہ بنانا انتہائی قابل مذمت ہے۔وزیراعلیٰ نے ہدایت کی کہ زخمیوں کو فوری طبی امداد کی فراہمی کے لیے تمام دستیاب وسائل بروئے کار لائے جائیں اور ہسپتالوں میں زخمیوں کے فوری علاج سمیت ضروری طبی سہولیات کی دستیابی یقینی بنائی جائے۔
یہ بھی پڑھیں: کوہاٹ میں پولیس لائن کے قریب دھماکا ،15افراد جاں بحق
انہوں نے شدید زخمیوں کو ضرورت کے مطابق دیگر ہسپتالوں میں منتقل کرنے کے انتظامات کرنے کی بھی ہدایت کی۔وزیراعلیٰ خیبرپختونخوا نے کہا کہ دہشت گردی کی بزدلانہ کارروائیوں سے قوم کے حوصلے پست نہیں کیے جا سکتے۔
