پاکستان میں بجلی کا بحران ،عوام پریشان

اسلام آباد ( پاک ترک نیوز) گیس اور آئل کی قلت کی وجہ سے ملک میں بجلی کا سنگین بحران شدت اختیار کر گیا، گیس اور فرنس آئل کی قلت کے باعث بجلی کی پیداوار بری طرح متاثر ہوئی ہے، جس کے نتیجے میں لاہور سمیت بڑے شہروں میں طویل لوڈشیڈنگ نے شہریوں کی زندگی اجیرن بنا دی ۔
لیسکو میں رات کے اوقات میں بجلی کا شارٹ فال تین ہزار میگا واٹ سے بھی بڑھ گیا ہے، جس کے باعث لاہور شہر میں چار سے پانچ گھنٹے تک کی غیر اعلانیہ لوڈشیڈنگ کی جا رہی ہے۔شہری علاقوں کے ساتھ ساتھ دیہات میں صورتحال مزید خراب ہو چکی ہے، جہاں آٹھ آٹھ گھنٹے تک بجلی کی بندش نے معمولات زندگی مفلوج کر دیے ہیں۔
لاہور میں چار سے پانچ گھنٹے اور دیہات میں چھ سے آٹھ گھنٹے تک بجلی بند کی جا رہی ہے ۔
این ٹی ڈی سی حکام کے مطابق ملک میں جاری بحران کی بنیادی وجوہات میں گیس کی شدید قلت اور فرنس آئل کی بڑھتی ہوئی قیمتیں شامل ہیں۔توانائی کے وسائل کی کمی کے باعث بجلی کی پیداوار مطلوبہ سطح تک نہیں پہنچ پا رہی، جس سے شارٹ فال میں مسلسل اضافہ ہو رہا ہے۔
شہریوں کا کہنا ہے کہ بار بار اور طویل لوڈشیڈنگ نے کاروبار، تعلیم اور گھریلو زندگی کو بری طرح متاثر کیا ہے۔ گرم موسم میں بجلی کی بندش نے مشکلات میں مزید اضافہ کر دیا ہے۔
توانائی کے بحران پر قابو پانے کے لیے فوری اور مؤثر اقدامات نہ کیے گئے تو آنے والے دنوں میں صورتحال مزید سنگین ہونے کا خدشہ ظاہر کیا جا رہا ہے