لاہور(پاک تریک نیوز ) پنجاب حکومت کے "زیرو بیگنگ پنجاب” وژن کے تحت سٹی ٹریفک پولیس لاہور نے پیشہ ور گداگری کے خاتمے اور مستحق افراد کی بحالی کے لیے ایک پائلٹ منصوبہ شروع کر دیا گیا، جس کے تحت ہنر کی تربیت، بلاسود قرضے اور روزگار کے مواقع فراہم کیے جائیں گے۔
چیف ٹریفک آفیسر سید عبد الرحیم شیرازی کی زیر صدارت ہونے والے اجلاس میں پنجاب سمال انڈسٹریز کارپوریشن کے منیجنگ ڈائریکر مبین الٰہی اور الخدمت فاؤنڈیشن کے پراجیکٹ ڈائریکٹر محمد سنان نے شرکت کی۔ اجلاس میں مستحق بھکاری خاندانوں کی بحالی کے لیے مشترکہ حکمت عملی پر اتفاق کیا گیا۔
منصوبے کے پہلے مرحلے میں الخدمت فاؤنڈیشن 10 مستحق خاندانوں کی نشاندہی کرے گی، جبکہ پنجاب سمال انڈسٹریز کارپوریشن ہر منتخب خاندان کو چھوٹا کاروبار شروع کرنے کے لیے 5 لاکھ روپے تک کا بلاسود قرض فراہم کرے گی تاکہ وہ باعزت روزگار حاصل کر سکیں۔
اجلاس میں لاہور کی کچی آبادیوں میں جھگی اسکول قائم کرنے کا بھی فیصلہ کیا گیا، تاکہ بھیک مانگنے والے بچوں کو تعلیم کی طرف راغب کیا جا سکے۔ اس کے علاوہ مستحق خواتین، بچوں اور خواجہ سرا افراد کو بیوٹی کورسز، سلائی، کڑھائی اور دیگر فنی تربیت فراہم کی جائے گی تاکہ انہیں روزگار کے بہتر مواقع میسر آ سکیں۔
سی ٹی او عبد الرحیم شیرازی نے کہا کہ الخدمت فاؤنڈیشن کے رضاکار بھکاریوں کی نشاندہی، سروے اور ڈیٹا اکٹھا کرنے میں سٹی ٹریفک پولیس کی معاونت کریں گے، جبکہ منظم گداگری کے نیٹ ورکس اور ان کے سرغناؤں کی شناخت کے لیے بھی مربوط حکمت عملی اپنائی جائے گی۔
یہ بھی پڑھیں: پہلی بار ٹیکس گوشوارہ جمع کرانے والوں کے لیے بڑی سہولت
انہوں نے کہا کہ انسانی اسمگلنگ اور منظم پیشہ ور گداگری میں ملوث عناصر کے خلاف متعلقہ قوانین کے تحت سخت قانونی کارروائی کی جائے گی، تاہم غربت کے باعث بھیک مانگنے پر مجبور مستحق افراد کو سزا دینے کے بجائے ان کی بحالی، فنی تربیت اور روزگار کے ذریعے خود کفیل بنایا جائے گا۔
انہوں نے بتایا کہ رواں سال سٹی ٹریفک پولیس لاہور 3 ہزار 500 سے زائد بھکاریوں کے خلاف کارروائی کر چکی ہے، جبکہ اب قانونی کارروائی کے ساتھ ساتھ بحالی، ہنر مندی کی تربیت اور روزگار کی فراہمی پر بھی خصوصی توجہ دی جا رہی ہے تاکہ اس مسئلے کا مستقل حل نکالا جا سکے۔
