لاہور( پاک ترک نیوز) ایل ڈی اے نے فیروزپور روڈ پر ارفع کریم ٹاور کے قریب تقریباً 119 کنال اراضی پر جدید ٹیک پارک قائم کرنے کا فیصلہ کرلیا ہے۔ایل ڈی اے حکام کے مطابق اندرونی مارکیٹ ریسرچ رپورٹس میں اس اراضی کو آئی ٹی اور دیگر متعلقہ کاروباری سرگرمیوں کے لیے موزوں قرار دیا گیا ہے، جس کے بعد یہاں ٹیکنالوجی اور آئی ٹی کے شعبے کا بڑا مرکز قائم کرنے کا منصوبہ تیار کیا گیا ہے۔ایل ڈی اے کے چیف ٹاؤن پلانر ون اسد الزمان کے مطابق منصوبے میں نجی شعبے کو بھی سرمایہ کاری کا موقع دیا جائے گا۔ مختلف سائز کے کمرشل پلاٹس تیار کیے جائیں گے جبکہ ٹیک پارک میں جدید سہولیات کے ساتھ مختص پارکنگ پلازہ بھی تعمیر کیا جائے گا۔
یہ بھی پڑھیں: زمین کی قدرتی کولنگ شیلڈ کمزور پڑنے لگی، برف پگھلنے سے عالمی درجہ حرارت بڑھنے کا خطرہ
یہ وہی اراضی ہے جہاں ماضی میں سبزی اور فروٹ منڈی قائم تھی۔ ایل ڈی اے نے یہ تقریباً 119 کنال زمین 1978 میں ماڈل ٹاؤن کوآپریٹو ہاؤسنگ سوسائٹی سے خریدی تھی، جس کے بعد یہاں فروٹ اینڈ ویجیٹیبل مارکیٹ قائم کی گئی۔ماحولیاتی مسائل کے باعث ایل ڈی اے نے 2011 میں منڈی کو فیروزپور روڈ، کوٹ لکھپت سے کاہنہ منتقل کردیا تھا۔ منڈی کی منتقلی کے دوران 103 دکانداروں کو دکانوں کے ڈھانچوں، منتقلی اور دیگر نقصانات کی مد میں 76 کروڑ 10 لاکھ روپے سے زائد معاوضہ ادا کیا گیا، جبکہ باقی اراضی لینڈ ایکوزیشن ایکٹ کے تحت حکومت نے تقریباً ایک ارب 84 کروڑ 70 لاکھ روپے میں حاصل کی۔بعد ازاں مختلف سرکاری و نجی اداروں کی جانب سے اس اراضی میں دلچسپی ظاہر کی گئی۔ دسمبر 2021 میں ایل ڈی اے نے مکمل 119 کنال اراضی اسپیشلائزڈ ہیلتھ کیئر ڈیپارٹمنٹ کو دو ارب روپے سے زائد میں اسپتال کی تعمیر کے لیے دینے کی منظوری دی تھی، تاہم محکمہ مقررہ رقم ادا نہ کرسکا۔
بعد میں جنوری 2023 میں سابق وزیراعلیٰ اور اعلیٰ حکام نے تقریباً 57 کنال اراضی مفت فراہم کرکے 100 بستروں کا اسپتال بنانے کا فیصلہ کیا، لیکن یہ منصوبہ بھی عملی شکل اختیار نہ کرسکا۔اب ایل ڈی اے نے اسی زمین کے لیے ٹیک پارک سٹی کا نیا منصوبہ تیار کیا ہے۔ منصوبے کے تحت تقریباً 50 کنال اراضی کمرشل استعمال کے لیے مختص کی گئی ہے، جبکہ تقریباً 1.12 کنال سرکاری عمارت، 6.17 کنال پارکس اور تقریباً 60 کنال پارکنگ اور سڑکوں کے لیے مختص ہوگی۔منصوبے میں ایک، آٹھ اور 15 کنال کے پلاٹس رکھے گئے ہیں۔ ان پلاٹس پر گراؤنڈ پلس پانچ منزلہ، یعنی 72 فٹ تک اور گراؤنڈ پلس چھ منزلہ، یعنی 90 فٹ تک عمارتیں تعمیر کرنے کی اجازت ہوگی۔ایل ڈی اے کے مطابق منصوبے کے تحت پلاٹس کی پہلی نیلامی 14 اکتوبر کو ہوگی، جبکہ باقی پلاٹس کی نیلامی 2027 اور 2028 میں مرحلہ وار کی جائے گی۔
ایل ڈی اے کو پلاٹس کی نیلامی سے مجموعی طور پر تقریباً 13 ارب 56 کروڑ 60 لاکھ روپے آمدن کی توقع ہے۔ اس کے علاوہ پٹرول پمپ اور فوڈ آؤٹ لیٹ کے لیے جگہ لیز پر دینے کی نیلامی سے تقریباً 4 کروڑ 50 لاکھ روپے آمدن متوقع ہے۔
