اسلام آباد ( پاک ترک نیوز) وزیراعظم محمد شہباز شریف نے کہا ہے کہ عوام کو سرکاری خدمات کے حصول کے لیے دفاتر کے چکر لگانے کی ضرورت نہیں ہونی چاہیے، شہریوں کو ان کی دہلیز پر تیز، شفاف اور معیاری خدمات کی فراہمی حکومت کی ترجیح ہے۔وزیراعظم کی زیر صدارت پاکستان آسان خدمت مراکز کی کارکردگی، توسیع اور ملک کے مختلف علاقوں میں نئے مراکز کے قیام کے حوالے سے اجلاس ہوا۔وزیراعظم نے کہا کہ آسان خدمت مراکز کے ذریعے شہریوں کو ایک ہی چھت تلے متعدد سرکاری خدمات بروقت فراہم کرنا حکومت کی اولین ترجیح ہے۔
وزیراعظم نے اسلام آباد میں آسان خدمت مرکز کی مختلف سہولیات کی فراہمی کا وقت مزید کم کرنے کی ہدایت کی، جبکہ مرکز کی توسیع کا عمل تیز کرنے اور شہریوں کی ضروریات کے مطابق مختلف کاؤنٹرز پر عملے کی تعداد بڑھانے کی بھی ہدایت کی۔وزیراعظم نے آسان خدمت مرکز اسلام آباد کی تیسرے فریق سے کرائی گئی کارکردگی کی جانچ کی رپورٹ بھی پیش کرنے کی ہدایت کردی۔اجلاس میں بریفنگ دی گئی کہ اسلام آباد کے آسان خدمت مرکز میں جنوری سے ستمبر تک ایک لاکھ 71 ہزار سے زائد درخواستوں پر کارروائی کی جاچکی ہے، جبکہ مرکز کی خدمات سے 99.5 فیصد شہریوں نے اطمینان کا اظہار کیا۔بریفنگ کے مطابق آسان خدمت مرکز اسلام آباد میں مختلف خدمات کی فراہمی کا اوسط وقت 3 سے 10 منٹ ہے۔وزیراعظم نے مظفرآباد، گلگت اور اسکردو میں آسان خدمت مراکز پر جاری کام تیز کرکے انہیں جلد فعال کرنے کی ہدایت بھی کی۔
یہ بھی پڑھیں: سونے کی قیمت میں بڑی کمی
وزیراعظم نے پشاور اور بنوں میں آسان خدمت مراکز کے قیام کے لیے فوری اقدامات شروع کرنے کی ہدایت کرتے ہوئے کہا کہ دونوں شہروں میں موجود وفاقی عمارتوں میں مراکز کے قیام کا جامع منصوبہ جلد پیش کیا جائے۔شہباز شریف نے نجی شعبے کے اشتراک سے ملک کے دیگر علاقوں میں بھی آسان خدمت مراکز قائم کرنے کی ہدایت کی۔اجلاس میں وفاقی وزراء ڈاکٹر مصدق مسعود ملک، احد خان چیمہ، عطاء اللہ تارڑ، شزا فاطمہ خواجہ، طارق فضل چوہدری اور متعلقہ اداروں کے اعلیٰ افسران شریک ہوئے۔
