اسلام آباد(پاک ترک نیوز ) اعلیٰ پولیس افسر کے گھر میں 13 سالہ گھریلو ملازمہ فاطمہ کی ہلاکت کے مقدمے میں گرفتار پولیس افسر کی اہلیہ اور بچوں کو پڑھانے والے قاری کو عدالت نے چار روزہ جسمانی ریمانڈ پر پولیس کے حوالے کردیا۔
دونوں ملزمان کو مجسٹریٹ نعیمہ عفت کی عدالت میں پیش کیا گیا، جہاں پولیس نے تفتیش کے لیے جسمانی ریمانڈ کی استدعا کی۔ عدالت نے استدعا منظور کرتے ہوئے ملزمان کو چار روز کے لیے پولیس کی تحویل میں دے دیا۔
واضح رہے کہ دو روز قبل اعلیٰ پولیس افسر کے گھر کام کرنے والی 13 سالہ فاطمہ مبینہ گھریلو تشدد کے باعث زندگی کی بازی ہار گئی تھی۔
پولیس ذرائع کے مطابق واقعے کا مقدمہ بچی کے والد کی مدعیت میں تھانہ شمس کالونی میں درج کیا گیا ہے۔ ابتدائی طبی معائنے کے دوران بچی کے جسم پر تشدد کے نشانات بھی پائے گئے تھے۔
یہ بھی پڑھیں: عمران خان کی آنکھ میں لگنے والا انجیکشن کیا ہے؟
دوسری جانب پولیس افسر محمد بن اشرف نے بتایا تھا کہ فاطمہ کافی عرصے سے ان کے گھر میں رہ رہی تھی اور واقعے کے بعد انہوں نے خود پولیس سے رابطہ کیا تھا۔
پولیس واقعے کی مزید تحقیقات کر رہی ہے تاکہ بچی کی ہلاکت کے محرکات اور ذمہ داروں کا تعین کیا جا سکے۔












