نئی دہلی ( پاک ترک نیوز) بھارت اور جاپان نے دفاعی تعاون کو نئی جہت دیتے ہوئے جدید بحری دفاعی ٹیکنالوجی کی مشترکہ تیاری اور پیداوار کے اپنے پہلے بڑے منصوبے پر اتفاق کر لیا ، جسے بحرِ ہند و بحرالکاہل میں دونوں ممالک کے اسٹریٹجک تعاون کے لیے ایک اہم پیش رفت قرار دیا جا رہا ہے۔
دونوں ممالک نے جاپان کے جدید یونیکورن انٹیگریٹڈ ماسٹ سسٹم کو مستقبل میں بھارتی بحریہ کے جنگی جہازوں پر نصب کرنے کے لیے میمورنڈم آف امپلیمنٹیشن پر دستخط کیے ہیں۔
یہ جدید نظام ریڈار، مواصلاتی آلات اور مختلف اینٹینا کو ایک مربوط ماسٹ میں یکجا کرتا ہے، جس سے جنگی جہازوں کی اسٹیلتھ صلاحیت، الیکٹرانک وارفیئر، مواصلاتی کارکردگی اور دشمن کی نگرانی سے بچنے کی استعداد میں نمایاں اضافہ متوقع ہے۔
اس منصوبے کو جولائی 2026 میں نئی دہلی میں ہونے والی 16ویں بھارت۔جاپان سالانہ سربراہی کانفرنس کے دوران باضابطہ طور پر اعلیٰ سطح پر توثیق دی گئی۔
یہ بھی پڑھیں: یاماہا کا 30سال بعد مقبول ترین اسپورٹس بائیک کی پیداوار بند کرنے کا اعلان
بھارتی وزیرِاعظم نریندر مودی نے مشترکہ پریس کانفرنس سے خطاب کرتے ہوئے کہا کہ دفاعی شعبے میں یہ بھارت اور جاپان کا پہلا مشترکہ ترقیاتی منصوبہ ہے، جو دونوں ممالک کے درمیان دفاعی ٹیکنالوجی کے تعاون میں ایک "نئے باب” کا آغاز ثابت ہوگا۔
مودی کے مطابق دونوں ممالک مستقبل میں جدید دفاعی ٹیکنالوجیز کی مشترکہ تیاری پر بھی کام کریں گے تاکہ خطے میں بحری سلامتی، علاقائی استحکام اور قواعد پر مبنی انڈو پیسیفک نظام کو مزید مضبوط بنایا جا سکے۔
