ناگویا (پاک ترک نیوز )جاپان کے شہر ناگویا میں ریکارڈ بارش کے باعث شدید سیلابی صورتحال پیدا ہوگئی، جس کے بعد ایشین گیمز میں شریک کھلاڑیوں اور حکام کو عارضی طور پر محفوظ مقامات پر منتقل کردیا گیا۔
غیر ملکی میڈیا کے مطابق تقریباً 400 کھلاڑیوں اور حکام کو رہائش گاہوں سے نکال کر محفوظ مقام پر منتقل کیا گیا ہے۔
شدید بارش کے باعث ایشین گیمز کے بعض مقابلوں کے مقامات میں بھی پانی داخل ہوگیا۔
رپورٹس کے مطابق ناگویا میں صرف ایک گھنٹے کے دوران 104 ملی میٹر بارش ریکارڈ کی گئی، جس کے بعد مختلف علاقوں میں سیلابی صورتحال پیدا ہوگئی۔
سیلاب کے خطرے کے پیش نظر حکام نے شدید ترین درجے کی پانچویں سطح کی وارننگ بھی جاری کردی۔
انتظامیہ کے مطابق شدید بارش اور سیلاب کے باوجود کسی کھلاڑی یا عملے کے رکن کو نقصان نہیں پہنچا۔
ناگویا کے میئر ایچیرو ہیروساوا نے کہا ہے کہ ایشین گیمز مقررہ پروگرام کے مطابق ہوں گی اور کھیلوں کے انعقاد میں کوئی رکاوٹ نہیں ہے۔
جاپان کے شہر ناگویا میں ایشین گیمز 19 ستمبر سے 4 اکتوبر تک جاری رہیں گی، تاہم بعض مقابلوں کا آغاز 17 ستمبر سے ہی ہوجائے گا۔
