ٹوکیو ( پاک تر ک نیوز) جاپانی موٹرسائیکل ساز کمپنی یاماہا نے اپنی مشہور اسپورٹس بائیک YZF-R6 کی پیداوار ختم کرنے کا اعلان کر دیا ، جس کے تحت کمپنی اس ماڈل کا آخری خصوصی ایڈیشن متعارف کرائے گی۔
یاماہا نے 599 سی سی انجن سے لیس YZF-R6 کو 1999 میں متعارف کرایا تھا۔ یہ دنیا کی پہلی 600 سی سی فور اسٹروک پروڈکشن اسپورٹس بائیک تھی جو فیکٹری حالت میں 100 ہارس پاور سے زیادہ طاقت پیدا کرتی تھی، جس نے اسے موٹرسائیکل شوقین افراد میں بے حد مقبول بنا دیا۔
ماہرین کے مطابق گزشتہ چند برسوں کے دوران 600 سی سی سپر اسپورٹس بائیکس کی طلب میں مسلسل کمی اور سخت ماحولیاتی قوانین کے باعث یاماہا نے کئی ممالک میں اس کا سڑکوں پر چلنے والا ماڈل پہلے ہی بند کر دیا تھا۔ تاہم کمپنی ریسنگ کے شوقین افراد اور قومی سطح کی موٹرسائیکل چیمپئن شپ میں حصہ لینے والے رائیڈرز کے لیے Race Base Model کی تیاری جاری رکھے ہوئے تھی۔
اس بائیک میں 599 سی سی لیکوئیڈ کولڈ اِن لائن فور سلنڈر انجن کے ساتھ جدید الیکٹرانک فیچرز، جن میں ٹریکشن کنٹرول اور کوئیک شفٹر شامل ہیں، فراہم کیے گئے ہیں، جبکہ یاماہا کے روایتی بلیو رنگ نے بھی اسے منفرد شناخت دی۔
یہ بھی پڑھیں: پرائیویٹ جیٹ کا ایک گھنٹے کا کرایہ کتنا ؟
دوسری جانب موٹرسائیکل ساز کمپنیاں اب زیادہ طاقتور مڈل ویٹ ماڈلز کی جانب منتقل ہو رہی ہیں، جبکہ یاماہا بھی اپنی نئی تین سلنڈر R9 اسپورٹس بائیک کو مستقبل کا اہم ماڈل قرار دے رہی ہے۔
کمپنی کے مطابق YZF-R6 Race Base Model کا آخری خصوصی ایڈیشن آئندہ سال فروری 2027 میں جاپان میں فروخت کے لیے پیش کیا جائے گا۔ اس بائیک کی خریداری صرف پیشگی بکنگ کے ذریعے ممکن ہوگی۔ پہلی بکنگ یکم جولائی سے 31 جولائی 2026 تک جبکہ دوسری بکنگ یکم اگست سے 31 اگست 2026 تک جاری رہے گی۔
