ٹوکیو ( پاک ترک نیوز) اے آئی اور سیمی کنڈکٹر شعبے میں سرمایہ کاروں کی بڑھتی دلچسپی نے جاپان کی کارپوریٹ دنیا الٹ دی ۔ سافٹ بینک گروپ نے دو دہائیوں سے زائد عرصے بعد ٹویوٹا موٹر کارپوریشن کو پیچھے چھوڑتے ہوئے جاپان کی سب سے قیمتی کمپنی کا اعزاز حاصل کر لیا۔
جاپانی اسٹاک مارکیٹ میں کاروبار کے دوران سافٹ بینک کی مارکیٹ ویلیو تقریباً 47.2 ٹریلین ین (296 ارب ڈالر) تک پہنچ گئی، جبکہ ٹویوٹا کی مارکیٹ ویلیو 45.7 ٹریلین ین (287 ارب ڈالر) رہ گئی۔
یہ بھی پڑھیں : امریکا ایران جنگ ،جاپان اور چین نے امریکی ٹریژری بانڈز میں بڑی کمی کر دی
ٹویوٹا کا 2003 سے جاری جاپان کی سب سے بڑی کمپنی ہونے کا اعزاز ختم ہو گیا۔ ٹویوٹا نے 23 سال قبل ٹیلی کام کمپنی این ٹی ٹی ڈوکومو کو پیچھے چھوڑ کر یہ مقام حاصل کیا تھا۔
دوسری جانب مصنوعی ذہانت سے متعلق سرمایہ کاری کے باعث سافٹ بینک کے حصص میں رواں سال تقریباً 73 فیصد اضافہ ریکارڈ کیا گیا ہے۔ کمپنی نے حال ہی میں فرانس میں اے آئی کمپیوٹنگ کلسٹرز کے قیام کے لیے 75 ارب یورو (87 ارب ڈالر) تک سرمایہ کاری کا اعلان کیا ہے۔
