نئی دہلی(پاک ترک نیوز ) بھارتی دارالحکومت دہلی میں فضائی آلودگی کے خدشات کے باعث بھارت اور سری لنکا کے درمیان پہلے ون ڈے میچ کا مقام تبدیل کر دیا گیا۔
میڈیا رپورٹس کے مطابق بھارتی کرکٹ بورڈ نے دسمبر میں متوقع خراب موسمی حالات اور فضائی آلودگی کے پیش نظر میچ دہلی سے وشاکھاپٹنم منتقل کرنے کا فیصلہ کیا ہے۔
بھارت اور سری لنکا کے درمیان پہلا ون ڈے میچ 13 دسمبر 2026 کو شیڈول ہے، جس کی میزبانی اب دہلی کے بجائے وشاکھاپٹنم کرے گا۔
بھارتی کرکٹ بورڈ کے مطابق دہلی اینڈ ڈسٹرکٹ کرکٹ ایسوسی ایشن نے میچ کا مقام تبدیل کرنے کی درخواست کی تھی۔ درخواست میں دہلی میں ممکنہ خراب موسم اور کرکٹ اسٹیڈیم میں مجوزہ تزئین و آرائش کے کام کو بھی وجہ قرار دیا گیا تھا۔
واضح رہے کہ بھارتی دارالحکومت دہلی گزشتہ کئی ہفتوں سے شدید فضائی آلودگی کی لپیٹ میں ہے، جس کے باعث شہریوں کو صحت اور معمولات زندگی کے حوالے سے مشکلات کا سامنا ہے۔
