اسلام آباد ( پاک ترک نیوز) وزیر مملکت داخلہ طلال چودھری نے کہا ہے کہ پاکستان میں ہونے والی دہشت گردی کے لیے افغان سرزمین استعمال ہورہی ہے اور دہشت گردوں کو بیرونی قوتوں کی مدد حاصل ہے۔اسلام آباد میں نیوز کانفرنس کرتے ہوئے طلال چودھری نے کہا کہ انٹیلی جنس بنیاد پر کیے گئے آپریشن میں افغان دہشت گرد جرائم کے نیٹ ورک کو بے نقاب کیا گیا ہے۔ یہ نیٹ ورک پاکستان میں دہشت گردی کے لیے سہولت کاری فراہم کرتا ہے۔
یہ بھی پڑھیں: بجلی کے ساڑھے3ہزار فیڈرز پر چوری اور لائن لاسز کے باعث لوڈشیڈنگ ہے، اویس لغاری
انہوں نے بتایا کہ دہشت گرد جرائم کا نیٹ ورک منشیات، گاڑیوں، پٹرول اور اسلحے کی اسمگلنگ میں بھی ملوث ہے۔ دہشت گردی کا نیٹ ورک چلانے والے ضیاء نامی شخص کو گرفتار کیا گیا ہے، جو گزشتہ ایک دہائی سے مختلف افراد کو اسلحہ فراہم کرنے کا کام کررہا تھا۔طلال چودھری نے الزام عائد کیا کہ بدقسمتی سے دہشت گرد جرائم کے نیٹ ورک کو سیاسی پشت پناہی بھی حاصل ہے۔ ان کے مطابق بھارتی اور پاکستان مخالف غیر ملکی ذرائع ابلاغ اور سماجی رابطوں کے پلیٹ فارم نے کالعدم جوائنٹ ایکشن کمیٹی کو حمایت فراہم کی۔وزیر مملکت داخلہ نے کہا کہ آزاد کشمیر میں نام نہاد عوامی ایکشن کمیٹی کو ٹھوس شواہد کی بنیاد پر کالعدم قرار دیا گیا۔ انہوں نے پریس کانفرنس کے دوران کالعدم ایکشن کمیٹی کے شرپسند عناصر کی مبینہ پرتشدد کارروائیوں سے متعلق ویڈیوز بھی پیش کیں۔
