اسلام آباد ( پاک ترک نیوز) وزیراعظم شہبازشریف کا کہنا ہے برآمدات پر مبنی ترقیاتی اہداف کا حصول ہماری اولین ترجیح ہے۔
نیشنل ٹیرف کمیشن کی فعال اور شفاف کارکردگی ملکی صنعت، تجارت اور سرمایہ کاری کے فروغ کے لیے ناگزیر ہے، انفارمیشن ٹیکنالوجی اور مصنوعی ذہانت کا استعمال کرتے ہوئے کمیشن میں جدت لائی جائے۔
وزیراعظم کی زیر صدارت اجلاس ہوا جس میں معیشت کی مجموعی ترقی اور اس حوالے سے نیشنل ٹیرف پالیسی کے نفاذ کے حوالے سے غور کیا گیا ،وزیراعظم شہبازشریف نے کہا سرمایہ کاروں اور صنعت کاروں کی سہولت کے لیے نیشنل ٹیرف کمیشن اپنافعال کردار ادا کرے۔
اجلاس میں نیشنل ٹیرف پالسیی کے بارے میں بریفنگ میں بتایا گیا نیشنل ٹیرف پالیسی کے تحت مختلف شعبوں کے لیے ٹیرف میں مرحلہ وار کمی کی جائے گی، جس کا مقصد برآمدات پر مبنی اقتصادی ترقی کے اہداف کا حصول ہے۔
لاجسٹک کے شعبے کی ترقی اور فروغ کے لیے رییفرز کنٹینرز اور سیمی ٹریلرز پر عائد ڈیوٹیز کا خاتمہ کیا جائے گا۔ تعمیراتی شعبے کے فروغ کے حوالےسے سے اسپیشلائزڈ وہیکلز اور مشینری پر کسٹمز ڈیوٹیز کم کی جا رہی ہے۔فارماسیوٹیکل سیکٹر کو سہولیات دینے کے لیے خام مال خصوصاً کینسر کی ادوایات میں استعمال ہونے والے خام مال پر کسٹم ڈیوٹی ختم کی جائیں گی۔
برآمدات پر مبنی ترقیاتی اہداف کا حصول ہماری اولین ترجیح ہے،وزیراعظم
