لاہور( پاک ترک نیوز) لاہور میں عبداللہ طاہر قتل کیس کی تفتیش میں مزید اہم حقائق سامنے آگئے۔تفتیشی ذرائع کے مطابق پولیس کو شوٹرز کو ہائر کرنے والے ارسلان جٹ کے ساتھ گوجرانوالہ میں مقیم رہنے والی ایک پشتو بولنے والی لڑکی کی بھی تلاش ہے، جو مبینہ طور پر ارسلان جٹ کے ساتھ رہتی تھی۔
ذرائع کا کہنا ہے کہ ارسلان جٹ کے ساتھ رہنے والی دوسری خاتون پشتو بولنے والی لڑکی کے حوالے سے جانی جاتی تھی۔
تفتیشی ذرائع کے مطابق ارسلان جٹ اور مرکزی دو شوٹرز کی آخری لوکیشن وزیرستان کے "گرباز” نامی علاقے میں ٹریس ہوئی۔
دوسری جانب ارسلان جٹ کی سابق اہلیہ اور عبداللہ طاہر کے ڈرائیور اصغر سے دوستی کرنے والی ٹک ٹاکر لاریب سے بھی تفتیش جاری ہے۔
ذرائع کے مطابق ارسلان جٹ کے لیے گاڑی اور موٹر سائیکل کا انتظام کرنے والے ذیشان اور عدیل بھی سی سی ڈی کی حراست میں موجود ہیں۔
یہ بھی پڑھیں: عبداللہ طاہر کیس میں اہم پیش رفت، ڈرائیور کو ہنی ٹریپ کرنے والی ٹک ٹاکر ملزمہ گرفتار
پولیس مختلف کرداروں کی کڑیاں ملانے اور مبینہ شوٹرز سمیت دیگر ملزمان تک پہنچنے کے لیے تحقیقات جاری رکھے ہوئے ہے۔
